“Ua siitia a‘u e Iesu”
“O sē ua fiafia, ina pese ia”. O upu lava o le Afioga paia a le Atua. Leitioa foi le fatu pese o Tavita a fatu ana pese i le Tusi o Salamo ona o lo ta loto ua tumu i le fiafia.
O le fotuai mai o lenei talutalu fou, ma ona suiga ua ua matua televave mai lava, e a‘e ai ni lagona e lauga ai le feau peitai e matuā mafai lava ona lauga foi le pese.
A o fenumiai faatai o palolo ma fetautauai faaauvaa lelea mafaufauga pe aisea ua vave ma matua puupuu saasaa ai nei aso o le soifuaga, e tali a le Tusi o le Ola.
E fatufatu manatu ma lagona o le au tusipese, e avea lea o se matagi e agi fisaga pe a mālu upu ma fati o ni pese aemaise lava i viiviiga o le Atua.
O le pese foi o se vailaau aogā lea e momoliina le fiafia i se loto ua mafatia poo se tasi foi faatoa mapu mai i ni galuega fita. A oo ina see lelei le faafofoga i musika, e toe maligi ai lava loifofoga pe a toe tepa i tua i ni mafutaga.
Ae sei tuu ane la i ni pese faaleagaga, e tei a ua sisii ai ma aao ae lei masani ai, pe a ootia lagona i le logomalie o siufofoga o le au lagi pese aemaise o upu ma itu e faaautu ma faatatau i ai pese.
E pei la o le uluai CD ua logologoā nei i le aai o Brisbane, ua faaigoaina “Ua siitia a‘u e Iesu” mai le Fuesaina Family. Sa pueina i le falepuepese lauiloa o le FIAFIA RECORTZ i Melepone, e le afioga ia Lupematasila Levae.
O le taimi e faalogoina ai lenei CD e ese le logomalie i le faafofoga e le gata o siufofoga malie ae o le oa foi o mafaufauga o le susuga i le Faafeagaiga ia Pr Faamalologa Fuimaono, o ia lea sa tusiina ma faanotaina pese.
O alo lava o le susuga i le Faafeagaiga ma le Faletua ia Tamara o loo usuina le tele o pese faatasi ai ma le lagolagosua a i laua.
O tamaitai ia o Maxine Fuesaina, Jessie Fuesaina, Pam Fuesaina ma le alii o Panojess Fuesaina. O loo galulue le susuga i le faafeagaiga i le Ekalesia Aso Fitu Samoa Tutoatasi i Ipswitch i Brisbane nei.
O le susuga i le faafeagaiga ia Pr Faamalologa e mai le alalafaga o Lefaga-o-Alii ae o le faletua ia Tamara e mai Safotu i Savaii lava.
E sefulu pese o i totonu o lenei cd: O le pese muamua o le aai paia, (2) Iesu le Tali (3) Satauro (4) Atua foafoa (5) Build an Ark (6) Iesu ua suitulaga (7) Taui o au galuega (8) Tāua o lana Afioga (9) Olega i mātua matua (10) Thank you Lord for your blessing.
O le fuata ma lona lou, o le tau foi ma le mea e tupu ai. E eseese foi lagona o le susuga i le Faafeagaiga ma le faletua ma le nofoaalo na a‘e ai se tofa e faataunuu lea CD. E maualuga lava i le faaleagaga ma le faaolataga.
Faamanuia tele le Atua i le taleni aua le lagiina o viiga o le Atua. O loo maua uma nei CD i le Runik Polynesian Town ma le Enchiro Islandfreight ma nisi o faleoloa i Brisbane. A fia moomia foi ni CD e mafai ona faafesootai le Susuga i le Faafeagaiga i le Ekalesia SISDAC i Kuiniselani.
