O le Aso Sa, aso 6 o Fepuari na tatalaina ai le ‘Olo poo le Divine Mercy i le pitonuu o Woodridge i Logan.
O le 4 ai nei o ‘Olo ua mae‘a ona tatalaina ma faatuina i Brisbane nei, o Darra, Goodna, Inala ma Woodridge.
E pei ona silafia ai e le Ekalesia Katoliko lea vaega tāua i totonu o le galuega. Na faataunuuina uma tu ma aga masani e pei ona masani ai le Ekalesia Katoliko i lea foi vaega tāua i totonu o le galuega. Sa faatumulia i vaega uma a Divine Mercy ma o latou taitaifono faapea le puleaga Katoliko a Kuiniselani.
Sa taitaia lea sauniga tāua e le afioga ia Patele Epati Tamati, ma o ia foi o loo vaaia le puleaga Katoliko i lenei foi setete.
Na maualuga lea aso i le faatasi atu a tamaitai Sa, afioga ia Sister Sesilia Ioane faapea le tamaitai Sa ia Sister Paula Asiasia o le ituaiga o Sister of Nasareth.
Sa vaaia le lagolagosua o ekalesia Katoliko Samoa uma sa auai faatasi ai ma le tele o malo faaaloalogia na molimauina lea faamoemoe.
O le fofoga o le aso o le susuga ia Sauafu o le Peresitene lea o le ‘Olo a Woodridge, o ia foi o le Peresitene a le puleaga Katoliko Samoa i Brisbane.
O faaaloaloga ma palapala a malo sa faasafua i le paia ma le mamalu o le atunuu sa auai.
E iai le talitonuga ua taumasuasua ipu a le ekalesia poo le Divine Mercy a Woodridge i upu timai na ala mai i lana auauna e lototetele ai ma malolosi i le amataina o lenei galuega.
Na foi le gogo ma si ana i‘a i le tele o faamanuiaga e lē gata i le faaletino, ae faasili i la le agaga.