O le uluai CD mo le tautua pese faaleagaga a le faletua ia Tope Fatua‘au, ua faaigoaina, “E Gagana Loimata”. O se faatinoga mai lea o se moemitiga ua leva ona tulimatai i ai le faletua poo le tamaitai pese.
O le Aso Faraile la, aso 25 Ianuari, sa tatala aloaia ai loa lenei galuega tāua poo le CD pese, e pei ona faatautaia ai i le ekalesia a le Samoa Christian Universal Church i Manurewa, i lalo o le taitaiga a le susuga i le faifeau toeaina o le pulega, o ia foi o le faifeau a lea ekalesia i Manurewa, le susuga ia Pelenato Taupau.
E 10 pese o loo i totonu o lenei CD fou, ma o pese ma viiviiga o loo peseina lava e le faletua. O lona sini autū e pei ona auina mai ai lenei faamatalaga e se sui o le aiga, o le faanaunautaiga o le faletua ina ia faamalieina se tasi o manaoga faapitoa, ia iai ni pesepesega faaleagaga mo le faalauteleina atu o lana galuega o le tala‘ia o le Upu a le Atua.
O le ala lea o le ta‘ua o se finagalo o le faletua ina ia toe sosoo lenei tautua, i se isi foi CD faapea i le lumanai, pe a tusa ai ma le finagalo o le Tamā i le lagi.
O tuaa o Tope Fatua‘au, o le susuga i le faifeau ia Tupuola Pou ma le faletua ia Pa‘i Tupuola, mai afioaga o Lano i Savaii, Saaga i Siumu, ma Falelauniu i Faleata, o inā foi o loo galulue faafaifeau ai nei ona mātua i le ekalesia lava lea a le Samoa Christian Universal Church i Falelauniu i Samoa.
O lona alii, le susuga i le alii a‘oa‘o o Mikaele Fatua‘au e mai le afioaga o Vaimoso i Faleata, ma e toalua o la alo.
E momoli le faafetai tele a le tamaitai pese i le uso ia Tara, o lē sa a‘oa‘oina lana taleni ua tiu ai nei, aemaise nisi o ana fatuga o loo i totonu o lenei lava CD.
E faafetai foi i ona aiga, aemaise nai ona mātua, Reverend Tupuola Pou ma Pa‘i Tupuola, faapea lana faafetai i le susuga ia Tagaloa Kirisome mo le pueina ma le tuufaatasia o le CD.
E fia momoli foi lana faafetai tele i lana faifeau, Reverend Pelenato Taupau ma Ruta ma le Ekalesia atoa i le nofo tatalo, faapea foi ana uo i le lagolago atu i upu faalaeiau a o feagai ai o ia ma le tapenaina o lenei CD fou.
