Tatala uluai CD ‘Empowerment’ & Website AOG Gateway Mangere

E lei faigofie le tauasaina mai o le faamoemoe o le Ekalesia AOG Gateway i Mangere, peitai ua inu i le suamalie o faamanuiaga a le Atua ina ua tatala aloaia le latou CD pese muamua ma le latou upega o fesootaiga (www.gatewayministries.org.nz) i le po o le Aso Toanai o le faaiuga o le vaiaso.
O lea faamoemoe sa faia i le hall a le Shiloh Building Buckland Road, Mangere, i le nofoaga masani o loo faatinoina ai a latou sauniga lotu ma na amata i le 7pm i le afiafi. O le tausaga 2006 na faavae ai lenei lala o le Ekalesia AOG, a o lea ua ausia se tasi o moemitiga, se tofa mamao sa momoo i se aso e faataunuuina ai, a o lea ua a‘e manuia faiva, ua tini pao le uto, ua maualuga le Viiga o le Atua ae tumau le faatauvaa o le tagata.
E iai fuafuaga a le tagata, e faamata faigata, ae a faamoemoe i le Atua e faigofie mea uma. Auā e moni ai le Filipi 4:13, “Ou te mafaia mea uma lava i le faamalosi mai o Keriso ia te au.”O tapenaga faapenei, e tele se taimi e moomia e fuafua ma faatulaga ai, peitai na atagia ai le fai vavega o le Atua, i le na o le sefuluono aso na pueina ai ma tuufaatasia lenei CD pese. E fitu pese i totonu o lenei CD lotu, peitai e pei na saunoa le susuga i le faafeagaiga o le Ekalesia AOG Gateway, le susuga Pastor Galumalemana Veni Morisa, ‘o se taimi muamua lea ua pue ai se CD a le aufaipese, ua lē gata o pese ma fatuga, ae ua tuuina foi i ai ma musika (soundtracks) o pese uma o loo iai i totonu o le CD, e atoa i ai le sefulufā o pese ma musika’.
O le faanaunauga ia faasoa atu viiviiga o le Atua i soo se tagata e faalogologo ai, poo ai foi se tagata, ekalesia ma faalapotopotoga e fia faaaogāina nei fātuga faaleagaga e usuina mo ni faamoemoe tāua, o loo ua iai soundtracks ua saunia lelei, atoa ai ma upu uma o pese ua faafaigofie lea mo soo se tasi.
O lenei vaitau o tupe lava mea uma, peitai, o se tasi nei o molimau ola na avea ma faamanuiaga i le maitau a le aofia i lea po, i le faatinoga atoa o lenei CD, e leai se sene apa na alu ai, ona o se faamanuiaga lea na agalelei ai se tasi o auauna a le Atua mai Aferika e fia ofoina lana fesoasoani mo le pueina fua o le CD atoa a le aufaipese, e aunoa ma se totogi. O le po foi lea na tatala aloaia ai foi se tasi faamoemoe e patino i le ekalesia, o le upega o fesootaiga (website) ua faafaigofie ai foi ona fesootai ma silafia faamatalaga uma ma polokalame faataatitia mo lenei tausaga.
O le vaitau o le malamalama faatekonolosi ua fesoasoani tele foi mo le faagaioia ma le faailoaina o faamatalaga uma mo le momoliina o le finagalo o le Atua i lea tagata ma le tagata, e ala i fesootaiga i luga o upega o faamatalaga.
O loo iai foi le latou polokalame faaevagalia ua faasauni i ai Pastor Galumalemana ma le ‘au, o le a malaga ai mo Amerika mo le tolu ma le ‘afa vaiaso, lea o le a tuua ai Niu Sila nei i le Aso Tofi, auā lava le tala‘iina o le Atua ma lona finagalo i totonu o Amerika.
Na molimauina le lē ofi o le nofoaga, e ta ane le 7pm e amata ai le faamoemoe ua tumu le car paka ma lē ofi le hall i le toatele o susuga i Faafeagaiga o Ekalesia eseese sa auai, o aiga, uo ma ē masani na faatasi i lea po.
A maua sou taimi, silasila i le latou website fou, www.gatewayministries.org.nz, mo nisi o polokalame e fia silafia atili, aemaise sau kopi o le latou CD pese lotu fou ‘Empowerment’. O se po matagofie le polokalame a le autalavou ma se taumafataga māmā na faaiu ai mea ma ta‘ape ai lava ma le fiafia.