E tele auala sa vaaia ai faamanuiaga a le Atua na sasaa ifo i le mamalu o le aofia sa molimauina le tatalaina o le CD lona tolu a le Ekalesia Peace Chapel mai Samoa e pei ona faia mai i Aukilani.
O nisi sa faailoa lea i le sisii o lima, patipati ma alalaga, a o nisi lava foi sa tutū i luga ma pepese faatasi ina ua faamalieina le agaga tapuai i lea afiafi, a o usuina ma faagasolo le polokalame pese a le aufai pese mai le atunuu.
O se vaaiga sa matuā faamaonia ai le faauuga ma le mafutaga vavalalata ma le Agaga o le Atua, ona o le saolotoga ma le olioli faaleagaga sa ufitia ai le aufaafofoga.
E lei toe faatulagaina e nisi sa mafuta ai, poo le ā le ituaiga ekalesia ma le talitonuga o loo auai, ae peitai ua laugatasia uma ina ua iai le saolotoga e pepese ai ma vivii faatasi ma le aumalaga mai Samoa.
O le molimau a nisi ina ua feiloai atu i ai ma fesiligia le lagona i lea po, ae sa faaalia e se tasi o tamā matua, o ia sa na o le faalogo lava i pese o tāina i le leitio Samoa, ma tosina i ai lona loto, ona o le mālie o upu ma fātuga, a o lea faato‘ā vaaitino ia i latou o loo saunia ia pese ma viiga.
Na solosolo lelei le talanoaga ma lea foi aiga, ma iu ai ina lāvea ane ai ma le ekalesia o loo tapuaia ai, na toe fesiligia ai pe mata e talia e lana faifeau le tulaga ese sa iai lona fiafia i lea po ma le faatinoina o lana tapuaiga. Na tali le toeaina poo le ā le itu, tali atu i ai le Samoa Times, ona e talitonu e lē taliaina le patipati ma le sisii o ou aao i totonu o le malumalu.
Na ata le toeaina ma faapea mai lana tala, e pule lava le faifeau latou pe talia pe lē fiafia foi, a o a‘u ia ua lē mafai ona toe taofia le agaga ootia ma le olioli e vivii i le Atua.
E manaia foi ituaiga po faapea ona e mafai ai ona tatala le avanoa e fefaasoaa‘i ai finagalo ma mafaufauga o tagata, aemaise o se avanoa ua saoloto ai le tagata lava ia e fai soo se gaioiga e faatino ai lona valevalealofa i le Atua, e auala ane i viiga, auā ona pau lea o le auala o loo molimau i ai le Tusi Paia, e afio ese ai le Atua mai lona nofoalii mamalu, ae mafuta ma le tagata e ala i le viiga ma le faaneetaga.
E lei toe iai se nofoa na totoe o le malumalu o le susuga i le faafeagaiga ia Kuki Aloalii ma le faletua ia Lupe, aemaise o le ekalesia a le Livingston Evagelia Samoa, ona o le taupati atu ma le lagolago a le atunuu i le faamoemoe o le vaega mai Samoa.
O le susuga ia Samoa Unoi ma le faletua ia Alisi na ta‘ita‘i mai le malaga, ma o i laua foi sa feauauai mo le faasoasoaina o pese ma viiga i lea afiafi, a o le galuega pese lava latou ia sa nafa ma le au.
O le tele o pese o le CD, sa tusia lava e le faletua ia Alisi, ma tuu atu i le au latou te faaleoina.
O le susuga ia Chris Sola sa ia tatalo mo le amataina o le polokalame, a o le susuga ia Kuki Aloalii sa tatalo mo le faamae‘aina o le faamoemoe.
O le aso ananafi sa toe taliu atu ai i Samoa le au, ma molimauina foi le tele o le faatau i lea afiafi e lē gata i le vaega tolu e pei ona sa faalauiloaina, ae faapea foi isi vaega e lua sa amata lauiloa ai lenei aufaipese.
E toatele foi nisi o auauna ma tagata lautele, sa latou molimauina le faaaogāina pea o musika ma pese a le aufaipese, i totonu o latou falesa, aemaise o sauniga faaevagelia a nisi foi o mafutaga ma lotu.
