Tatala Taamilosaga Tafatolu Samoa i Niu Sila

O le afiafi o le aso Faraile na tea nei na faatumulia ai le Kalapu Lakapi a Otahuhu i le Paia ma le mamalu o le atunuu ma le au valaaulia ona o le tatalaina aloaia o le taamilosaga o le Tafatolu i le taaloga o le Lakapi i Niu Sila nei mo le taimi muamua.
Na aofia ai i le mamalu o le valaaulia le Afioga i le Palemia o Samoa lea sa fai ma malo faapitoa, le afioga le Faipule o Magele le tofa Sua William Sio, faapea le Komesina o Samoa i NZ, le afioga Asi Semisi Blakelock, faatasi ai ma Susuga Faafeagaiga ma faauluuluga o pisinisi lagolagoina lenei faamoemoe taua.
O le susuga le Faafeagaiga Ionatana Pouli Lefale sa fai ma taitai o le sauniga e siitia le Viiga i le Atua e pei ona masani ai Samoa i ana potopotoga, ona faasolo ai lea o lauga a i latou sa lautogia i lea afiafi e pei o le afioga le Peresetene o le NZ Samoa Rugby Union, Aiolupotea John Roach, ma le susuga i le malu o le malo Alf Filipaina sa fai ma sui o Niu Sila e faafeiloaia malo faaaloalogia ina ua maea le lagiina o fua o malo e tolu ia o loo auai a latou au i le Tri Nation 2010.
Sa faamuliga saunoaga uma o lea afiafi i le lauga faapitoa a le faatama o le Iuni Lakapi i Samoa le afioga le Palemia Tuilaepa Sailele Malielegaoi.
O le fofoga o le po o le tofa ia Vui Vitale o se tasi o tamalii o le atunuu o loo avea nei ma sui o Samoa i le Fono faufautua o le Council a Manukau.
O se afiafi felanulanuai i le faatumulia o le maota e le gata i le au valaaulia ao pulega a au e tolu o le Taamilosaga. Sa vaaia foi i lea po nisi iloga i le Lakapi a le atunuu i tausaga ua mavae, aemaise faauluuluga o le Ofisa o le Iuni Lakapi a Samoa.
O le aso Toonai lea na tea nei na tatala aloaia ai loa le Taamilosaga o le tafatolu o loo aofia ai au e lua a NZ, le NZ Samoa ma le Aotearoa Samoa, faapea foi le au fili a Ausetalia Samoa, ma le au a le tatou atunuu le Samoan Babarian.
E nao le lua taaloga na faaiu i ai le aso muamua o le taamilosaga na mafai ona maua ele Samoa Times le iuga, o taaloga foi la ia a au sinia ona sa amata le taamilosaga i taaloga a tama i lalo o le 20 tausaga, ma taaloga i le va o au a tamaitai.
O le aso Lulu a sau nei o le a faaauauina ai le Taamilosaga tafatolu, ona faamaeaina lea i le aso Toonai nei lava i sailiga siamupini e faia lava i le malae a Waitemata Rugby Club, lea o loo faia ai le taamilosaga, ao le iuga la lenei o taaloga a au Sinia :-
Niu Sila Samoa 26 – Ausetalia Samoa 16, Samoa Babarian 33 – Aotearoa Samoa 12.
O le Taamilosaga lenei na amataina i le tausaga na tea nei, lea na faia i Samoa, ao lea ua talimalo ai le NZ Samoa Rugby Union aua ua leva le sailia o ni tama pito sili ona lelei mo taamilosaga o le tausaga nei, e le gata i le Tri Nations masani a Samoa, Tonga ma Fiji, ao le Pacific Rim foi lea e taaalo ai ma au lona lua a Ausetalia NZ ma Iapani.
O le maitau a le atunuu sa molimauina taaloga, e matua maualuga le tulaga siitia ua i ai nei le faagatama lenei o le lakapi i le tomai ua i ai alo ma tama fanau mai Samoa, pea faatusatusa i le tele o ai ma avanoa na latou laasia ai le laina sikoa i le latou taaloga ma Aotearoa Samoa.
O le aso Lulu nei o le a taaalo ai NZ Samoa ma Aotearoa Samoa, ae taaalo Ausetalia Samoa ma le au masii mai le tatou atunuu le Samoa Babarians.