Le faletua ia Jane Vaafusu’aga

Le faletua ia Jane Vaafusu’aga

O le faalauiloaina mai o le tusi faitau mo fanauiti “O MOSE ma le Manumea” o se faatofāla’iga na gapatia ai le faletua ia Jane Vaafusu’aga faatasi ma nisi na latou galulue faatasi, mo se faamoemoega ma se fuafuaga tāua. O se tusi faitau e mafai ona fiafia uma ai tagata o le aiga e faitau, ae o se tusitusiga foi e mafai ona felafolafoa’i ai ni manatu faaleo e avea ma puna’oa o ni talanoaga aogā i totonu o potua’oga. Auā o le faataatiaga o faamatalaga o loo faamatala ai lenei tala, e mafai ona avea o se puna’oa o a’oa’oga auā o loo faamatala ai nisi o mea moni e uiga i le manulele o le manumea poo isi foi manu faasao o Samoa.

O loo momoli mai ai foi se feau i le tāua o le puipuia o lenei manulele faasao o le manumea – o se tasi o manulele ua matuā lamatia lava le tulaga o le tauau ina lē toe maua i vaomatua o Samoa.

O se tala manaia i le savaliga a le alii o Mose ma lona tausoga o Niko sa agai ai i le vaomatua o le latou nuu e saili i le manulele o le Manumea, ina ua la faalogo i le faasalalauga mai le leitio ua amata ona tau lē toe maua lenei manulele a Samoa i ona vaomatua.

O le la savaliga lea na matuā o’oo’o ai i le loloto o le vaomatua ma la matauina ai le ofoofogia o le matagofie o le vaomatua ma meaola o loo ola ai, ae sa taulai pea le la sailiga mo le fia maua o le manulele, le manumea.

O le fuafuaga o lenei tusi e pei ona tusia i le itulau pito i tua, o se seleni e maua mai le faatauina atu i tua o lenei tusi faitau, o le a tuuina uma i le Faaputugatupe mo le Faasaoina o le Lotoā Manu i Aukilani, auā le puipuia ma le faasaoina o le manumea ma isi ituaiga o manu faasao i Samoa.

O le tusi na tusia e Jane Vaafusu’aga ma Rebecca Stirnemann i le gagana Peretania, ae faaliliu faasamoa e Avikaila Sopoitulagi Tilialo, ae o ona ata na tusia e Christina Brady.

O sina tala puupuu e uiga i le faletua ia Jane Vaafusu’aga na fanau ma soifua ane i  Eastbourne, i Ueligitone ae o ona mātua e tupuaga mai Sikotilani. O ia o se tamaitai faiaoga, ma e 10 tausaga o galue o se faiaoga i aoga i Aukilani ae fā tausaga na galue ai faafaiaoga i Apia i Samoa. E nonofo Jane ma lona toalua o Tuiafutea Olsen Vaafusu’aga i Samoa i le afioaga o Falease’ela i Lefaga ma le la afafine o Coco.

E tu tonu le latou fale i autafa o le vaitafe o le Liua le Vai o Sina, o inā o loo faatino ai se latou pisinisi o le faamaimoaina o turisi i mea mata’ina eseese o le siosiomaga ma le aganuu. Ua matuā masani lelei Jane i le soifuaga o nuu i tua, i meafai a le aganuu, le gagana, le siosiomaga faalenatura, e auai i lotu ma tu ma aga faa-Samoa moni.

O lona fiafiaga lea o le naunau e tusitusi, pe a maua se masele mai ona tiute i le latou pisinisi, ma ofo foi lana fesoasoani i le aoga tulagalua a le latou afioaga lea na ia faatulaga ai se potutusi poo le library.

O se tamaitai e fiafia tele e tusitusi ana tala faitau ma tusitusiga e fiafia ma masani ai fanau a le Pasefika. Fai mai a ia, o le faaigoa o tagata ma nofoaga i igoa e masani ai tamaiti, e mafai ona iloa atu ai lo latou faagaeetia ma le fiafia e faitau.