Ua leva ona faailoa e le Matagaluega o Leoleo ma Falepuipui le faatuina o sona ofisa i le afioaga o Afega, ae o le vaiaso talu ai lea na faato‘ā taunuu ai lea fuafuaga ina ua tatala aloaia lea ofisa fou mo galuega faaleoleo.
O le a fesoasoani tele i mataupu e lipotia mai lea vaega o Upolu, ma o le a fesoasoani foi i le tau malaga mamao mai i le ofisa autū o leoleo i Apia o le mamalu o le atunuu.
O Faleolo o loo iai le isi ofisa ae o le iai o le isi faaopoopoga o ofisa mo galuega a le matagaluega o leoleo ma falepuipui i Afega, na faaalia e le Sui Palemia i le tatalaina aloaia, o se isi lea o laasaga mo le siitia o le tulaga i le puipuigamalu o le soifua ma meatotino a le atunuu i le faatupulaia o suiga fou ma alualu ai pea i luga ma ituaiga o solitulafono eseese e aliali mai.
O loo iai nei le fuafuaga a le Matagaluega o leoleo e faatu se isi ona ofisa i Palauli ma Salelologa ina ia vave ona tali atu i mataupu e manaomia ai le fesoasoani i lea faaitu o Savaii, ae mo Upolu lava ia o loo iai foi nisi ofisa o le a faatutū i nisi o nuu ma afioaga.
