Tatala se DVD mo le a‘oa‘oina o le gagana Samoa

E silia ma le 6000 gagana i le lalolagi atoa, ae tailua vaiaso ma mou atu le tasi poo le lua gagana. O le faamoemoe lea, o le “EFS mo Tamaiti” DVD.
E seāseā ona iai ni DVD mo le fanauiti, tamaiti ma i latou e fia a‘oa‘oina le gagana Samoa. O ata mo tamaiti i luga o le TV pei e o le “MickeyMouse” e i le faa-Peretania, o “Dora le Explorer” e i le faa-Sipaniolo ma le faa-Peretania, o le “Ni Hao Kai Lan” e i le faa-Saina ma le faa-Peretania.
O lea na manatu ai le pulega a le “EveryoneForSamoa (EFS)” ua tatau ona iai se DVD poo ni ata faapitoa mo Tamaiti Samoa. O le “EveryoneForSamoa (EFS) mo Tamaiti” DVD, o loo i le Gagana Samoa ma ona tusitusiga faa-Samoa ma le faa-Peretania i lalo ifo o ata.
Ua afua lenei taumafaiga ona o le fia fesosoani mo fanauiti, tamaiti ma ē matutua foi ona o mafuaaga nei:
•    Ua faaitiitia e le Malo Niu Sila tupe e faaalu i gagana a le Pasefika e aofia ai le Gagana Samoa.
•    O le faanaunauga ina ia aua le avea tulaga faapolokiki ma mafuaaga e mou atu ai la tatou gagana Samoa. Tatou tagi i lima. O o tatou lima lava e faaolaolaina ai la tatou gagana ma tu faa-Samoa. A tatou faalogologo atu i le Malo o Niu Sila ma ana tupe, ia o le iuga lea e iai, afai e tipi tupe mo gagana Pasefika (Samoa) o le a afaina foi ma mou atu la tatou gagana.
•    E fia a‘oa‘oina e a tatou fanau le gagana a o tatou tuaa ma mātua.
•    O le gagana Samoa e aulelei, lalelei ma e tele ma oloa ona ata faalemafaufau (concepts). E faamauoloaina o tatou mafaufau faapea mafaufauga a le fanau, pe a o latou iloa le gagana Samoa.
O lenei DVD mo Tamaiti, sa pueina ma saunia e le EFS, e aunoa ma se fesoasoani tau tupe mai se Malo. Tatou taumafai e laveai mai la tatou gagana Samoa ina ne‘i mou atu. O lea ata DVD e ta‘ua o le “EveryoneForSamoa mo Tamati” DVD e mālie tele ma o le a maua ai foi le fiafia ma le ‘ata. Ae lē gata i lea, e maua ai foi ma le atamai i le gagana Samoa. E iai le aufaamaneta o “Sapa” ma “Sui”, E iai foi le toa Samoa, o “Super Sefe Sefo”. O le a fiafia tamaiti faapea ma ē matutua i nei ata a le EFS poo le “EveryoneForSamoa”.
O lenei DVD o le “EFS” (Everyone For Samoa) o se galuega na amatamea ma fatufatu mafaufauga i ai le susuga ia Eliota Sapolu, ma le isi toavalu o ē na lagolago e aofia ai Josie Sapolu, Unasa Iuni Sapolu, Aumua To‘afa Te‘o ma le susuga Vela Manusaute o le Killa Kokonut Krew.
O loo faatauina ai lenei DVD i le Samoa Video Centre, 56 Atkinson Road, i Otahuhu ma le Five Star Motors, 318 Great South Road Manurewa ma le tele o isi nofoaga o pisinisi Samoa poo le telefoni i le (09) 2139999 mob: 0220681706.