O le vaiaso fou i le Aso Gafua e tatala aloaia ai le isi Ofisa faaopoopo o le kamupani lafo tupe a le Pacific Ezy Money Transfer i le nofoaga ua iai le Faleoloa o Faatoaga a le Malo Samoa i le Maketi fou i Fugalei.
O lea Ofisa fou ua lua i ai Ofisa o le Pacific Ezy Money Transfer i le motu o Upolu ma le isi lua i Salelologa ma Asau i le motu o Savaii. O le Ofisa autū o loo i le Amau Apartment and Mall i Saleufi. O le Ofisa fou lenei o loo i tafatafa tonu lava o le vaega e taulai i ai pasi i le maketi i Fugalei.
Na faaalia mai e le pule sili o le Pacific Ezy Money Transfer le Tofa Faimalo Allan Stowers, ua faaopoopo lenei Ofisa fou ina ia atili ai lava ona fesoasoani i le atunuu auā le faasaoina o seleni e ala i femalagaiga.
“Ua taugata foi le tau o taavale laiti, o le faatuina la o lea ofisa i le nofoaga e taunuu ai pasi, ua faasaoina ai le tai $6 a le atunuu e ala i le toe tau malaga i taavale laiti e tala a latou seleni lafo atu,” saunoa ai Faimalo.
Na ta‘ua foi e Faimalo, o lenei Ofisa Fou o le a atili ai foi ona vave ma faafaigofieina le talaina o tupe a le atunuu.
E lē gata foi i lea ae o le a faigofie tele lea mo Tuaa Sinasina auā o le a lē toe mamao se vaega e saili agai i ai le ofisa.
Ua toe faaopoopo le vasega o le aufaigaluega aemaise masini komepiuta auā le faatotogaina o lea ofisa fou. Ua silia ma le tolu vaiaso o a‘oa‘oina le aufaigaluega fou auā lea Ofisa i le maketi i Fugalei.
O se mitamitaga tele i le alii pule le tatalaina o lenei ofisa fou ona ua fetaui lelei ma le vaiaso pisi auā le Aso Sa o le fanau.
E talitonu Faimalo o le a avea lenei ofisa fou ma fesoasoani tele e lē gata i le aufaigaluega i le faatinoina o galuega ina ia vave ona maua e le atunuu a latou seleni auā foi faatauga o le Aso Sa o le fanau.
Na ta‘ua foi e Faimalo, o le tulaga ua fuafuaina e le kamupani e faatutū ai ona Ofisa, o loo tagai lea i vaega e mafai ona aofia uma i ai isi auaunaga aemaise lava faleoloa ma Ofisa totogi pili ina ia faigofie ona maua le tupe fai loa faatau pe totogi foi pili.
I le taimi a o iai le Pacific Ezy Money Transfer i le nofoaga o le Tuutuuileloloto, sa fai lava si faigata mo le atunuu feafioai ona o le vava mamao ma faleoloa ma nofoaga totogi pili. E lē gata i lea ae o le faigata foi pe a tumutumu aemaise lava i aso timuga.
O le faaaogāina foi e le Pacific Ezy Money Transfer o le ala o fesootaiga faaonaponei ua faapea ai ona faaaogāina le Internet e lafo ai risiti i Samoa ma mafai ai ona maua tupe a le atunuu i se taimi vave lava.
E ui i le taugata o le soifuaga ma le tulaga faaletonu o le tamaoaiga a le lalolagi lea ua tele ina aafia ai pisinisi i lenei vaitau, ae na saunoa Faimalo, ua taumafai lava le Pacific Ezy Money Transfer i ni auala e mafai ai ona faalautele lana auaunaga ma le tautua i le atunuu i le mafai e gata ai.
