Tatala ofisa fou Soifua Maloloina – silia 100 tausaga le Ofisa tuai

O le faaiuga o le vaiaso na tatala aloaia ai le ofisa fou a le Matagaluea o le Soifua Maloloina lea na amata ona fausia mai ia Setema o le tausaga na tea nei.
O le Afioga i le Palemia, Tuilaepa Sailele Malielegaoi na saunoa i le saunoaga autū o le faamoemoe, ma na ia ta‘ua ai o se tasi lenei o Aso faitaulia i le talafaasolopito o Samoa, ona a tagai i le Ofisa tuai a le Matagaluega, ua silia ma le 100 tausaga talu ona faavae mai lea fale, ma ua silia foi ma le 100 taitai ma tagata sa galulue i le tau atina‘eina mai o le Matagaluega.

“O le fale tuai lenei na fausia mai i le vaitau o Siamani a o pulea e lea Malo si o tatou atunuu, ma o le sini autū o le fausia o lenei fale ina ia siitia le tulaga o auaunaga faafomai ma ia faaleleia atili le tulaga o le Soifua Maloloina o tagata lautele o le atunuu. E aogā foi le siitia o tulaga o auaunaga faafomai ina ia faatonutonu lelei ai e i latou o le a faaaogāina tulafono ma faavae o galuega faasoifua maloloina aemaise o le taofia o le soona togafitia autago o tagata e i latou e lei taitai ona atoa le tomai faafomai”, o le saunoaga lea a le Afioga i le Palemia i le taimi o lana saunoaga autū.

Na ia faaalia foi o le galuega lenei na fausia e le kamupani a le Shanghai Construction mai le malo o Saina e auala mai i le Amepasa o lea Malo i Samoa le Susuga Zhao Weiping.

E 30 miliona tala Samoa le tau aofai o lea galuega ma e aofia uma i le fale fou lenei ua tatalaina ofisa uma o i latou o loo galulue i le Matagaluega faatasi ai ma ni potu mo masini komepiuta auā le faafaigofieina o galuega fai a le Matagaluega.

O le Afioga la i le Minisita o le Matagaluega o le Soifua Maloloina ia Tuitama Leao Tuitama na ootiina le lipine o lea Ofisa fou ma na tauaao atu i ai e le Amepasa o le Malo o Saina le ki o lea fale, ma na momoli le faafetai a le Minisita i le Malo ona o nei galuega matagofie ua tatalaina mo le Matagaluega aemaise o le atunuu atoa faatasi ai ma lana faafetai i le Malo Saina ona o le manatu fesoasoani mai ua mafai ai ona faatino nei galuega.

E mae‘a le sauniga o le tatala aloaia o lea maota tele ae amata se isi galuega i le isi ituala o le Maota fou lenei i Motootua lava.
O se sauniga faapitoa o le suaina o le palapala auā le isi galuega o le a toe alo atu iai le Kamupani lava a le Shanghai Construction.

O le fausia lea o se falemai fou i le vaega lea o loo iai le Ofisa tuai o le Matagaluega. O le Afioga foi i le Palemia, Tuilaepa Sailele Malielegaoi na saunoa i le saunoaga autū ma na ia ta‘ua e 66 miliona tala Samoa le tau aofai o le falemai fou lenei o le a fausia.

“O le faamoemoe tāua o lenei galuega tele o le a fausia o le siitia lava o tulaga o le soifua maloloina o tagata o le atunuu ma e iai foi le naunautaiga o le a fesoasoani lenei falemai i fanau aoga o loo aotauina i le Aoga Faafomai a le Itulagi faatasi ai ma le Iunivesite Aoao a le atunuu i le Papaigalagala mo a latou suesuega faaleaoaoga,” o le faaopoopo mai lea a le Afioga i le Palemia i lana saunoaga.

E mataina foi faafiafiaga sa faatinoina e le Matagaluega i le tatala ai o le latou Ofisa fou faapea le suaina o le palapala auā le amataina o le isi galuega mo le falemai fou mo le atunuu.

O nei galuega o vaega uma nei o fuafuaga faataatitia a lenei Matagaluega lea ua aofia ai le tuu eseese o le Matagaluega o le Soifua Maloloina ma le Auaunaga faafomai lava ia.

O le ofisa fou mo le Matagaluega ua faaagaga mo i latou o loo galulue i le fausia o faiga faavae auā le lelei aoao o le galuega faasoifua maloloina ae o le auaunaga lava ia faatausi soifua ma le faafomai lea ua i lalo o le Auaunaga faafomai lea ua ese foi lona pulega i lenei vaitaimi.