Ua tini lau o le faamoemoe o se tasi o tamalii o le atunuu e tusa ai ma lana tusi na gapatia ai i ni nai tausaga ua tuanai.
O le po o le Aso Aso Faraile 12 o Aukuso na faatumulia ai le Richlands Hotel i le tatalaina o le tusi faaleaganuu ua igoa o le ‘Lauloa ma le ‘Iga Fafaga, o ‘Oa natia”, na tusia e Fanaea Tupuola Pomade Simona, mai le alalafaga o Samatau i Samoa.
Sa amataina i se sauniga lotu na taitaia e le susuga ia Bishop Tinelu Tofa o le Uarota a Logan. Faatumulia lea faamoemoe i le paia ma le mamalu o le Uarota a Forest Lake faapea aiga ma uo.
O le afioga ia Tauiliili Ata Malifa sa fai ma malo faaaloalogia, o ia lea sa fofogaina le talaaga o le tusitala ia Fanaea Pomade Simona ona ua loa tele le la mafutaga.
Na logo faatutuila ai le aufaafofoga i le saunoaga a le afioga ia Tauiliili, o ia o se tamā ua loa foi i le tautua faafaasalalau i Ueligitone ma Brisbane nei, e pei ona tautua ai ma le faletua ia Elisapeta Malifa.
O le fofoga o le po o le susuga ia Taupa‘u Ulalei mai le aiga i le Tai. O le susuga ia Fa‘i Lavea mai Samata sa fai ma sui o le auvalaaulia e faafetaia le tusitala ma tauaiga ona o le maualuluga o faaaloaloga aemaise o le matagofie o lea foi faamoemoe, ma na vaaia le lagolagoina e le toatele o le atunuu.
Ua tele tusi na mafai ona faatauina i lea po auā na o le $50 sa ulu ai le tagata e toatasi ma maua ai ma le tusi.
O nisi na faatau ta‘i 2 ona o le fia auina atu mo nai mātua ma tauaiga i Samoa.
