O le mae‘a ai o galuega ma faiva masani i le Aso Faraile na se‘i mavae atu, sa faatumulia ai le Community Centre a Otahuhu i le faalauiloaina o le tautua pese a alo o le susuga i le Faafeagaiga EFKS i Magele i Sasa‘e, Rev Victor Pouesi ma le faletua ia Salome, le tamaitai ia Siuila Pouesi ma le Faletua ia Sanaima Anesone Taanuri faatasi ai ma le lagolago a Pagamalie Iopu Fa‘ivalu.
O se mafutaga faaaufaipese ua loaloa si umi i Niu Sila nei, i le taufaamasani mai lava i le amataga i aufaipese laiti, aemaise lava i le taleni pese o loo i le tamaitai ia Siuila Pouesi i lona siufofoga matagofie i le faalogo, a o le faletua foi ia Sanaima Anesone Taanuri i Aufaipese tetele.
O se tapenaga lenei o le tautua pese lona lua, o loo manatua ai nisi o auauna a le Atua o le talalelei, ia Rev Oka Fauolo, Rev Sale Autagavaia, nisi o fanau a le Ekalesia i Magele i Sasa‘e e oo lava i pelega i le mafutaga. Na faailoa e le Fofoga o le po, Pagamalie Iopu Fa‘ivalu o le tapenaga o pese sa tele se taimi o tau tuufaatasia, faatasi ai ma le lagolago malosi a le susuga i le faifeau ia Rev Victor Pouesi.
E lē gata i le faafatiina o le pese, ae o le faaupuina foi ina ia fetaui lelei ma le fati o le pese. Atonu e lē fou i le atunuu le tautaua ai o lenei aiga aemaise le faaiu Pouesi i le tele o pese ua mae‘a faanotaina ma o loo tusiaina pea e oo mai i le asō, o se taleni o loo tauave pea e augatupulaga o le aiga.
Sa mataina foi faafiafiaga o lea po mai autalavou, le faaili matagofie ua atili manaia ai lea afiafi ia i latou sa auai i lea po.
Na maua foi le avanoa e silasila ai le auvalaaulia i se faafiafiaga mai le tamaitai ia Jennifer Pagamalie Fa‘ivalu i lea lava afiafi.
Na matagofie le taumafataga na saunia mo lea afiafi aemaise ai lava le matuā faafiafiaina o le auvalaaulia i lea faamoemoe, o se lamepa e susulu pea i pesega ma o se lu‘i foi ina ia vaai lelei ma faatāuaina le taleni foai mai le Atua, ina ia matuā faatauaina. Na ta‘ape lea afiafi i le manuia ma le fiafia.
