E matautia le pomu na pa i le Aso Toonai ua mavae i totonu o le taulaga faatau i Magele i le tatalaina o le auaunaga fou a le Pacific Love faapea foi le tatalaina o le vaega lona lua o le ata tifaga Samoa, o le Tagi a le Faipopo.
Na feomai le feoai o tagata faatau i totonu o le taulaga faatau i le tumutumu o le mamalu o le atunuu na laulaututu ma maimoa ma faalogologo i siufofoga o le aufaipese a le Pacific Love. O loomatutua ma toeaiina na matuā usi le maimoa latou auā o se tasi lea faaili o loo fia faafofoga ai pea le atunuu i ana fatuga.
Na amata faafiafiaga i le 9 i le taeao ae uma i le tea o le tasi i le aoauli. O le fofoga o le aso o le afioga ia Peseta Savea Al Harrington Lavea. Na faafiafiaina le mamalu o le atunuu e nisi o sui iloga i musika le susuga ia Willie Tavita, Ili Faiumu, Ted Stanley, Tatau Dance Crew, Taro Talumba Sumba faapea le aufaipese a le EFKS mai Manurewa.
Ae na fesiligia e le sui o le nusipepa se tasi o tina na vaaia na saofai mai lava i le amataina o le faamoemoe seia oo ina uma faafiafiaga, poo le ā se tāua ia te ia o lenei polokalame ua nofo umi ai? Ae tali le tina, e manaia e maua ai le ata, ma maua ai foi le faamalosi tino nai lo le nofo i le fale.
O se tasi lea vaaiga na iai le Aso Toonai o le maua o le ata ma le siva pe a oso le musika.
Na lē motu foi le faatauina o le ata tifaga o le Tagi a le Faipopo i lona vaega 1 ma le vaega lona 2, auā o loo tulituli pea e le atunuu Masi ma lana faamalamalamaga aemaise o lana sipai ia Mu. Na saunia foi e le susuga i le alii pule ia Silafaga Naea Talo ni faailoga e fai meaaalofa ai mo le atunuu.
Sa faapea foi ona maua ai ma le avanoa e asia ai e le taitai o le Labour ia David Cunliffe ma nisi o lana vaega faaupufai le mamalu o Samoa na tumutumu ai i le faalauiloaina o le auaunaga fou a le Pacific Love. O lenei faamoemoe na fuafuaina lava e le susuga i le alii pule ia Silafaga Naea Talo ma le faletua faapea le pulega o le Pacific Love.
O le auaunaga a le susuga ia Silafaga Naea Talo, o loo i totonu o le taulaga faatau i Magele, ua mafai ona latou pueina soo se ituaiga musika faaneionapo faapea aufaipese i le pueina i tua poo le studio, faia o sound tracks, faaliliuina o tape i CD, tipiina o CD, tuufaatasia o ata o CD, ma latou faatauina foi ata tifaga auā le maimoa a le atunuu. Ua iai le faamoemoe o le alii pule e maua mai le vaega tolu o le Tagi a le Faipopo a o lei uma le tausaga.
