O le ogatotonu o le fatu o le aai tele o Manukau, o loo iai tonu le Nofoaga o Moemitiga, le Dream Centre lea na tatala aloaia i le Aso Toonai na te‘a atu nei, i se sauniga faapitoa o le powhiri o le tu faaaganuu a Maori.
Na feiloai ai le au valaaulia, ua na o i latou o taitai ma le pulega o le itumalo o Manukau, ma nisi o le au faipolokiki o le malo o Niu Sila ma faauluuluga o matagaluega ma pisinisi i totonu o le aai o Manukau i Aukilani.
I lea sauniga faapitoa, na auai le susuga i le pulenuu o Manukau o Len Brown, le sui pulenuu Gary Troup, faapea nisi o faipule Samoa e pei o Papalii Alf Filipaina, Efu Koka, faatasi ai foi ma le tamaitai Minisita o le Matagaluega o Tagata Pasefika, le Afioga Hon Georgina TeHeuheu.
I le saunoaga faapitoa a le pulenuu o Len Brown faapea foi le tamaitai Minisita, na la faafetai ma faamalo i le Komiti Faafoe a le Dream Centre aemaise le susuga i le faafeagaiga o Chris Sola ona o lona saili malo faapea lona finau ina ia faataunuu lana visiona ma le tofa mamao o le faatuina o le Dream Centre e avea ma se nofoaga tutotonu e fesoasoani tele mo le lumanai o fanau aemaise tagata Pasefika o le itumalo o Manukau ma Aukilani i Saute.
Na saunoa le taitaifono a le Komiti Faafoe a le Dream Centre, le tamaitai o Dr Ainsleigh Cribb Su‘a i se faamatalaga manino ma le malamalama o le otootoina o galuega faataatitia a le Komiti, auā se lumanai manuia o tagata lautele.
O le visiona, ia avea ma auaunaga autū mo le fesoasoani i le tamaoaiga ma faafitauli lautele o tagata.
O le faamoemoe a le Dream Centre, o le a faapitoa le faaaogāina o lea nofoaga mo sauniga faapitoa e pei o faaipoipoga, maliu, aso faamanatu, ma nisi sauniga e moomia ai se fale mautu e totogi ma faaaogāina mo ia faamoemoe.
E lē gata i lea, o le isi faamoemoe autū a le Dream Centre o le faatuina lea o se nofoaga e faalauiloa ai tu ma aganuu, ma faafiafiaga eseese a le
Pasefika.
E 4 eka le telē o le fanua o loo faamautu ai le Dream Centre, 400 paka mo taavale, 8 ituaiga fale tifaga i totonu, 350 tagata e mafai ona ofi i totonu mo ‘aiga ma sauniga o aso faapitoa. E 1,685 tagata e mafai ona auai i se koneferenisi e faaaogā ai potu tifaga uma.
O le faafegaiga ia Chris ma lona faletua ia Seira, ua atoa nei le sefulu tausaga i le galuega a le Atua, e pei ona amata mai ai i lalo o le faamalu a le Ekalesia Papatiso i totonu o Niu Sila.
