O loo faaauau pea ona faamanuiaina alo ma fanau talavou i lenei faaitu o Aukilani, i le mau avanoa tau aoaoga o loo ofoina mai e le BEST Pacific Institute of Education, auā lava le sailia o se lumanai mautinoa mo i latou i lenei vaitau ma le faasolo atu i luma.
O le sini autū lena ua faalauteleina o ni o latou tomai tau aoaoga auā le agai i luma o le soifuaga. Mai le tele o na avanoa, ua nofosauni ai foi e tatala mai le faitotoa vatele lea, aua le fesoasoani atu i talavou ua lē o toe aooga i lenei taimi.
O le aso 18 o Iuni lea na tatala aloaia ai lenei nofoaga fou o le BEST i Manukau, o se amataga lea o se talutalu fou o tulaga tau aoaoga mo fanau talavou i lalo o le polokalame a le Malo ua taulai faapitoa atu mo le tapueina o olaga aoaoina mo nei fanau talavou, le Government’s Youth Guarantee.
E tusa ma le 810 avanoa o loo maua i le polokalame lea a le Malo, le Youth Guarantee mo fanau talavou uma Aukilani, ma ua faamanuiaina ai le BEST Pacific Institute of Education i le 190 o na avanoa, lea ua faamatuu mai ai loa avanoa nei e 120 mo le nofoaga fou o le BEST i Manukau.
O lenei polokalame a le Malo, le Youth Guarantee, na ta‘ua i se saunoaga a le tamaitai Faatonu o le BEST, o Anita Finnigan, na faalauiloa mai le tausaga talu ai, 2009, ua ofo atu ai ni avanoa mo fanau i le 16 ma le 17 tausaga le matutua, o i latou ua lē o mafai ona faaauauina a latou taumafaiga i aoga maualuluga, ae o loo iai pea se isi avanoa e mafai ai ona faia ni aoaoga faavaitaimi (vocational courses) i le level lea e iai aoaoga e maualuluga atu (tertiary environment).
Ua silia ma le 20 tausaga o le tomai o le BEST i le tuuina atu o aoaoga ma fesoasoani mo le lagolagosua i fanau a le Pasefika i tulaga tau aoaoga.
Ae o le iai nei o lea polokalame faaopoopo mo fanau talavou, le Youth Guarantee, ua maua ai se avanoa lelei e tapu‘e atili ai tomai ma taleni a fanau talavou ina ia mautinoa e latou te ausia o latou moemitiga mo ni galuega lelei i le lumanai.
Mai le 120 o avanoa i lenei nofoaga fou o le BEST, e 114 avanoa ia ua uma ona faatumu, talu mai ona tatala ma amata le polokalame ia Ianuari o le tausaga nei. Ma o loo talisapaia lelei foi e isi aoga maualuluga i Manukau lenei faamoemoe o le BEST.
Ta‘ua i le pepa o faamatalaga, e tele nisi a‘oga ua fesootai atu i le BEST mo ni avanoa o nisi o le fanau aoga o loo fia faaulu atu mo le semester lona lua, o le ala lea ua ofoina mai ai nei e le nofoaga o le BEST i Manukau se isi aoaoga e faia i le ogatotonu o le tausaga, mo le semester lona lua i le 2010
Faamatalaga
O fanau e aooga i le nofoaga lea a le BEST Manukau Youth Campus o le a mafai ona lesitala e aooga ai i se tasi o polokalame mai polokalame nei e lima:
• Certificate in Business Administration – Level 3
• Certificate in Tourism and Travel – Level 3
• Certificate in Freight – Level 3
• Certificate in Employment and Computing Skills Course – Level 3
• Certificate in Sport and Recreation Course – Level 2
