O se tasi o moemitiga sa tele ni taimi na faufau ai ma taumafai ina ia tino mai, o se saunoaga lea a le Afioga i le Maopu o le Tuiaana, Tuigamala Vaaiga Tuigamala i le po o le Aso Toonai na tea nei, ina ua le ofi le Hall Taalo a le Aoga Maualuga a Tama i Kelston.
E le tau faailoa lea suafa i itu tau i taaloga pei ona lau silafia ai Inga i le lalolagi i le taaloga o le Lakapi, ae le gata i lea o le itu tau i
Pisinisi lea foi ua taulamua ai le Tamalii o le atunuu e pei ona iai lana fale mo tino maliliu i Aukilani Sisifo, faapea ai ma lana fale koleni lea e lei mamao atu ona tatalaina i New Lynn.
A o lea foi ua laasia le isi o vaega o lana tautua i le atunuu ma Niu Sila, e ala i le amataina o se Kalapu Fusu, lea ua faaigoaina o le Plantation Boxng Promotion, ia poo le Maumaga i se isi tauga.
O se afiafi ese lea foi po i le tala faasolopito o taaloga o Faipelega poo Fusuaga i Aukilani lava ia e ui foi o loo iai nisi tamalii o faia foi lea tautua, ona o le mafai ona vaaia ai nisi o toa ua leva i se taaloga o le Fusuaga ua le o toe taaalo, e pei o Monty Betham Senior, Alex Su’a, Maselino Masoe, nisi iloga i Niu Sila nei ma Toga e pei o Lance Revill, Paea Wolfgram, ia ma le malo faaaloalogia i lea afiafi, le afioga Toaletai David Tua ma lana faiaoga mai Amerika ia Roger Bllodsworth.
E 12 lelei lava paga o lea po faa-Amature, lea na tatala aloaiaina ai le taumafaiga a Vaaiga ma nai ona alo, o lea 12 e aofia ai ma paga a tamaitai, lea na fusu ai se tasi o alo tamaitai o le afioga a Tuigamala.
O paga faapitoa sa iai e aofia ai paga a nai ona alo tama e toalua, le alii o Vaise 16 tausaga ma le alii o Jordan Tuigamala lea na taualuga ai le po e 19 tausaga.
Sa maua le avanoa e fesiligia ai le afioga ia Tuigamala Vaaiga Tuigamala pe aisea ua fiafia ai ona alo e fusu a o ia o se tagata iloga ma tautaua i le Lakapi, ae na saunoa Inga na amata fiafia lava lana fanau i le fusu a o nonofo i Peretania i le sefulu tausaga talu ai, ma e talitonu o se vaega mai i ona tuaa i Samoa, lea e faapea e fiafia tele i le fusu, e pei foi ona iai le afioga ia Toaletai lona tausoga.
Sa faapea foi ona iai i lea afiafi le afioga i le Konesula o Samoa ia Faolotoi Reupena Pogi, o susuga i Faafeagaiga o Ekalesia eseese, uo ma aiga, aemaise o le atunuu lautele sa faatumulia ai lea afiafi.
E ui a la sa faiaina uma alo o le afioga ia Tuigamala ia la paga, ae sa lagona le olioli e pei ona sa faailoa e Inga ona o se mea muamua, ma e fai lava si vala o tausaga o alii sa au paga faatasi ma nai ona alo, o le paga mulimuli a le alii o Jordan Tuigamala 19 tausaga o le alii 31 tausaga le matua ma ua tele ana fusuaga faa-Amatuer i Niu Sila.
E ui ina faiaina le alii o Jordan i ‘ai ae na maualuga lana taumafai e pei ona sa molimauina, o le fofoga o le po o le susuga ia Howard Dobson, lea e na te faatautaia le Polokalame o Tala i Taaloga a le TV3. ma o le a le gata ai i i lea foi Maea Fusu fou, ae e faaauau pea mo lea foi taleni aua tupulaga lalovaoa, e fiafia i le Faipele, ia ma ono maua ai foi ni sui e ta’u ai Samoa i le lumanai.
