Ua iai se isi nofoaga tutotonu mo pisinisi laiti ua tatala aloaia i le faaiuga o lenei vaiaso. O le nofoaga fou lenei ua faaigoaina o le maketi o le taulaga ma o loo i le nofoaga lea sa iai le supamaketi lea na ta‘ua o le Citi Mart.
O le nofoaga lenei sa iai le faleoloa tele o le Citi Mart i Fugalei. Talu ai e lē o toe iai lea atinae ma ua lē o toe tatalaina foi le Maketi o fua o faaeleeleaga i autafa mo atinae e ese mai i fua o faaeleeleaga ma galuega taulima, o lea ua molimauina ai le toatele ua faapea ona saili ni nofoaga o le taulaga mo a latou foi atinae o oloa eseese.
Faaalia e Aliimuamua Kereta Ah Liki, o se fuafuaga lenei ua leva ona manatu e faatu ona o le vaaia pea o le toatele o le mamalu faipisinisi laiti a le atunuu ua ave a latou oloa i luga o auala savali i le taulaga mo le tau faatau atu i le atunuu ma na agai ese loa le Citi Mart, ua lē faaauau lana pisinisi manatu loa e tatau ona vaavaai i le fausia o se nofoaga e faamautu uma i ai le tele o ia faatau oloa.
O loo iai lava foi fuafuaga a le Malo ina ia aveese le tele o faatau oloa i luma o ofisa a le malo i le taulaga atoa ai luma o isi faleoloa. O le vaaiga ma i le itu auala lea e faafesagai ma le fale o le RSA i Apia i lalo ifo o le Maota o le ACC poo Taui o Faalavelave Faafuasei ua tele faleoloa ua faatutū ai i luga o auala savali ma le nofoaga o loo ua va ai lea itu ala ma le isi ituala i gatai ma o le vaega lea ua tele ina aliae mai ai feeseeseaiga a le matagaluega o leoleo atoa ai tagata faatau elei, faatau seevae, koko Samoa ma isi fualaau faisua ona e fai lava ma tutuli ese e leoleo ae o loo toe agai ane lava ona o le leai o ni nofoaga mautu e mafai ona tuu ai a latou oloa ma faatau atu i fafo.
O lea la ua mautu poloka poo fale laiti ua fausia i totonu o le nofoaga tele lenei sa iai le Citimart ma ua faaigoaina loa o le City Market.
“O le maketi a le Malo lea e autafa atu, ua lē o toe faataga ai foi ni faleoloa laiti ona toe faatutū ai ma o le tasi lava lea mafuaaga o le toatele o le au faipisinisi laiti ua tau saili nofoaga e faamautu ai,” o se faamatalaga lea a le Afioga Aliimuamua.
O le tele o faleoloa o fale ofu, o faleoloa o oloa faatau mai i fafo ae na ta‘ua e Aliimuamua e lē o iai se tapulaa poo ni aiaiga foi i le ituaiga pisinisi e fia faatu ai i lea nofoaga.
E 29 avanoa ua faatumulia uma i totonu o le maketi o le taulaga ma ua tatala lava foi le nofoaga atoa i le ao ma le po mo ia pisinisi e faatautaia ai a latou galuega.
O le mau a lenei tamaitai e tele nofoaga faapea i atunuu i fafo ma a lelei lava ona faatautaia pisinisi nei e mautinoa lava le faamanuiaina auā o se nofoaga e toatele le atunuu e savalia ma afea i taimi uma. O se tasi lea o vaega pisi o le taulaga o Apia.
O le tau o le poloka poo le fale e tasi e amata atu lava i le $400 tala i le masina seia paia le $900 i le masina ona ua fua lava i le tele o le fale e faaaogā.
O le fanua ma le fale lava ia o meatotino a le kamupani o le Bluebird Lumber lea e iai lona faleoloa tele i le isi itu o le auala lea ua iai nei le City Market ma o le pulega foi lea o lea maketi fou ua faatuina i le taulaga o Apia.
