O le faleoloa lona tolu a le Farmer Joe, na molimauina i le amataga o lenei vaiaso le tatala aloaia. Ua fausia i le nofoaga lea e i Vaitele sa faatautaia ai le nofoaga e gaosi ai le suauu popo i tausaga e tele ua mavae, peitai ua tele tausaga e lei toe faaaogāina lenei nofoaga ma ua faapea nei ona faatū ai le isi lala fou o lenei foi atinae ua silia i le lima tausaga talu ona amata i Samoa.
Faaalia e le alii pule sili ia AJ Cowly i le autusitala, ua matauina e le latou pulega o le vaega lenei o Vaitele ua faatuputupulaia tagata ua nonofo ai. E lei faailoa mai le tau o lenei atinae peitai ta‘ua e AJ, o atinae faapenei ua lausilafia uma e tagata le taugata.
Ua mafai ona faaopoopo i lenei supamaketi, oloa e lē o maua i isi lala o le Farmer Joe i Samoa nei. O le agaga lava ia maua e tagata lautele avanoa e fai ai filifiliga mo faiga faatau. O loo faagasolo nisi o faapitoa a lenei supamaketi mo vaiaso e lua. Ua tolu ai nei lala o le Farmer Joe i Samoa ma e to‘a 80 i latou ua maua avanoa faigaluega i lenei supamaketi.
O le tasi lenei o atinae ua faatūina e le tamalii faipisinisi o Charlie Ah Liki, ma o ni atinae nei ua agai i ai lea tamalii ma ua faaaogā ai le tele o faatoaga ma lafu manu ua ia faatautaia ina ia faaitiitia ai le tupe alu i oloa aemaise i fua o faaeleeleaga atoa ai manufasi mo pisinisi nei e pei o supamaketi.
O le tasi o le auuso o alo faasino ia Mani Westerlund Ah Liki ua tele a latou atinae ua faatutū i Samoa ma o le tamalii lenei ua ia gaosia foi le pia o le Taula ma le Sama i Samoa nei faapea le faguinu o le TAXI.
