Ua tatalaina nei i Salelologa le isi lala o le kamupani supamaketi a Frankies.
O se tala fiafia lea mo le mamalu o le atunuu o loo alala i lea foi itu o le atunuu, i le motu tele i Salafai, auā o le a faafaigofie ai feoaiga ma faatauga, i le lē toe moomia o le tau omai lava i Apia e tulituli mai faatauga i faleoloa o Frankies i Apia, talu ai o se tasi lenei o supamaketi o loo telē sana faamāmā avega i le tulaga o faatauga mo oloa manaomia i aso fai soo a le mamalu o le atunuu.
Saunoa le alii pule, Frankie Cai, o le agaga lava o le kamupani, ina ia faalautele atu lana auaunaga i soo se itu o le atunuu, mo le faafaigofieina o faatauga. O le taimi nei ua ono isi faleoloa o lenei lava kamupani o loo iai i Upolu, lea la ua fitu nei i le lala i Salelologa.
Ta‘ua e le alii pule, ua iai le fuafuaga o le a matuā faamautu le Frankies i Salafai ina ia faagasolo ai lana tautua faapisinisi mo se taimi umi, aemaise ia fesoasoani i tagata faatau mo le mauaina o ni oloa e lelei ae gafatia foi le tau.
E ese mai le faatulagaina o le faleoloa, ae na faia foi e le alii pule sana meaalofa mo nisi o aoga tulagalua e tolu i Savaii lava, e ala i le foai atu i ai i nei aoga taitasi, e ta‘i selau nofoa mo le aoga e tasi, e faaaogā i potu aoga o le fanau.
O le afioga i le alii Palemia, Susuga Tuilaepa Sailele Malielegaoi sa faia le saunoaga autū o le aso na tatala ai le nofoaga fou o le kamupani i Savaii, ma na unaia e le alii Palemia le mamalu o le atunuu i Salafai, aemaise lava i latou o loo alala i Salelologa, ina ia alolofa ma lagolago ane i si nei kamupani, aemaise foi le latou puipuiga malu, auā o se atinae e aogā mo latou uma lava.
Sa toe faamanatu foi e Tuilaepa i le kamupani a Frankies ina ia faatulaga lelei tau talafeagai mo ana oloa, ina ia mautinoa e gafatia e le aufaatau i lea itu o le atunuu.
Fai mai Tuilaepa, e sili atu ona lua tala le tau o se mea ae vave ai ona alumia, nai le tuu i ai o le tau e limasefulu tala, ae na o le taatitia ai lava i luga o fata o le faleoloa e lē taulia.
O le lauga lava lea a le Palemia, na ave ai foi ma lana luitau i isi kamupani supamaketi ma soo se kamupani lava, ina ia mafaufau foi latou e faasosoo atu i Salafai a latou pisinisi e pei o Frankies, ina ia atili ai ona lautele atu a latou pisinisi ma fesoasoani ai pea i le atunuu faatau.
Fai mai Tuilaepa, o lea ua mautu le taulaga i Salelologa, ua telē foi la le avanoa mo ni pisinisi e faatulaga ai e pei ona iai foi i Apia.
O le tele lava o pisinisi o le a faatulaga i lea itu o le atunuu, o le a tele ai foi galuega e ono moomia ai isi auaunaga e pei o felauaiga a vaa, taavale, ma vaalele.
O le kamupani a Frankies ua faatuina nei i Salelologa, e le gata o lana supamaketi, ae aofia ai ma le itu e faatau ai aano o manufasi (butchery), o le itu o meafale ma isi oloa tau fale e pei o mea e alu i le eletise (appliances section).
