O le faamoemoe ua taunuu o le laau lea o le ola, o le aso o le faafetai ma le viiga o le Atua auā ua ia faia lea aso e olioli ma fiafia ai tagata uma aemaise lava i le aufaigaluega a le Samoa Finance Money Transfer faapea le pulega ona ua taulau o le faamoemoe na moomoo iai le loto o le fia maua lea o se avanoa o le latou ofisa i le maota o le malo i Magele.
Ua molimau galuega lelei a le Atua mai le tasi po i le tasi po, o le tasi aso i le tasi aso e pei ona saunoa iai le taitai o le sauniga ia Rev Faleatua Faleatua i le tatala aloaina o le ofisa fou i Magele i le afiafi o le Aso Toonai ua mavae 23 o Fepuari.
Ao le saunoaga a le afioga ia Lemalu Ray Chewlit ua lagona lona fiafia ona ua mafai ona maua le latou ofisa i Magele i le maota o le malo, ona o lona loto e faamuamua ia te ia lona atunuu o Samoa e tautua Samoa. Lona lua o le saunoaga a le afioga ia Lemalu Ray o le fiafia lea ua maua le avanoa i le ofisa o le maota o le malo i Magele ina ia alu sao ai le totogiina o le tupe o le rent ia Samoa, nai lo le alu solo i isi tagata ao lea e iai avanoa i fale o Samoa e totogi sao iai le tupe o le lisi ma fesoasoani i nisi mea e fai a le malo.
O Magele o le tasi lea nofoaga o loo pito sili ona toatele ai tagata Samoa o loo nonofo ai ma o le tasi lea naunautaiga o le kamupani ia maua lava se avanoa i Magele ina ia faafaigofie i tatou tagata ona malaga atu e lafo a latou tupe i le ofisa.
Ua sefuluiva nei tausaga talu ona faavae mai le auaunaga a le Samoa Finance Money Transfer Ltd i Aukilani e pei ona amata mai ai i le tausaga 2000 i Otara, ao le tausaga 2006 na amata ai le isi auaunaga a le Samoa Finance Money Transfer i Otahuhu ma o lea ua sifi atu nei i Magele ma avea loa ma ofisa autu a le Samoa Finance Money Transfer Ltd ao lona lala e tasi o loo iai pea i Otara.
I le taimi nei o loo solosolo lelei ma manuia le tulaga o loo iai le auaunaga a le Samoa Finance Money Transfer Ltd mo tatou tagata aemaise o le Pasifika, ma ua siisii pea i luga le tulaga lelei o loo iai le tele o tupe lafo a aiga i Samoa, ma e leo fatamala ai foi le auaunaga i le vaai lelei o tatou tagata o loo lafoina a latou tupe.
O le faletua ia Ruby Lemalu na ia ootiina le lipine e tatala aloaia ai le ofisa fou i le maota o Samoa i Magele, ona faaulufale loa lea o le mamalu o le atunuu e maimoa ma matamata i totonu ma toe galue ai le taitai o le sauniga ia Rev Faleatua Faleatua e sausau le ofisa fou i le vaisa.
O le ofisa fou o loo i le fogafale pito i lalo o le maota o Samoa i Magele e faafesagai tonu ma le ofisa o le Samoa Airways le tatou kamupani vaalele.
O le maualuga o le faamoemoe ona sa mafai ona faatasi atu iai nisi o paaga a le kamupani o loo latou galulue faatasi i le lafoina lea o tupe faapea ma nisi o ofisa ua latou galulue vavalalata i lalo o le Maota o Samoa e pei o le Samoa Airways ma le SSAB.
E toaono le aufaigaluega o loo galulue nei i le Samoa Finance Money Transfer Ltd i le latou ofisa fou i Magele e aofia ai le susuga i le faletua ia Mariana Bourne o loo faauluulu iai lea ofisa faapea le faletua ia Jermaiane Ikenasio, Michael Soon, Shalamayne Rankin Afato, Fogalele Nofoaiga ma Tile Vili Fiti.
O le susuga ia Ivon Chewlit o ia lea o loo faauluulu iai le kamupani i Niu Sila nei faapea ma Samoa.
