O le a lē toe popole fanau aoga a le Don Bosco mai le motu tele i Salafai, e toe malaga mamao mai i Alafua i Upolu mo le aoga, auā o lea ua tatalaina nei se isi lala o le kolisi o matata eseese a le ekalesia Katoliko i Salelologa.
O le faaao o le ekalesia i Samoa, Lana Afioga i le Aki-Epikopō Alapati Mataeliga na taitaia le sauniga sa faapaia ma tatala aloaia ai lea atina‘e tāua a le ekalesia.
Ma sa ia ta‘ua i lana lauga le faatāua i le silasila a le ekalesia, o le manaoga ina ia iai pea ma faaalu e fanau aoga se taimi tele o o latou olaga talavou i totonu lava o o latou aiga ma siosiomaga na masani ona ola a‘e ai.
E tele itu lelei o lenei fuafuaga. E lē gata o le a aoga ai lava le tamaitiiti ma nofo i lona aiga moni, ae o le a lē aafia ai foi aiga, i le taumafai o nai mātua e masii mai e sue nisi nofoaga i Upolu, e nonofo faalatalata ai auā aoga a le fanau.
Ma e matauina, o le tele na o aiga o loo tumutumu ai nofoaga fou a le malo i Vaitele, ona o fuafuaga faapea a mātua, e fia faaaooga fanau i aoga i Apia.
Peitai o le iai nei o le isi lala o le Don Bosco i Salafai, e mautinoa o le a telē se lelei o le foia ai o lena tulaga.
Ma o le unaiga malosi lea na momoli atu i le lauga a le Katinale mo mātua uma i le motu i Salafai, ina ia tautuanā e faaaogā lelei lenei aoga e faaaooga ai loa fanau i Savaii ma latou nonofo faatasi ai pea.
Na ia saunoa, o mea nei e faatāua tele i aoga a le Katoliko, e lē gata ia a‘oa‘o fanau mo le atamai i le poto lautele, ae ia malosi foi lo latou olaga faaleagaga, ia malosi lo latou faatuatua.
O se lelei la lea o lenei suiga ua faia e le aoga a le ekalesia, ina ia a‘oa‘o atu e le aoga tomai o fanau i matata eseese mo galuega, ae ia malosi mai foi le a‘oa‘o a mātua i aso taitasi i le olaga faaleagaga o le tamaitiiti, i lana amio ma ona uiga faaletagata. Ma e faigofie ona taulau lena taulaiga, pe afai e aoga le tamaititi ma nofo i lona lava aiga, i ona mātua moni.
Sa auai foi le Palemia, Susuga Tuilaepa Sailele Malielegaoi i lea sauniga, ma sa ia ta‘ua ai le lagolago e le faigamalo o lea fuafuaga ua faia i le kolisi a le ekalesia.
Saunoa Tuilaepa, ‘ua talafeagai lelei le faatu o le aoga fou i Salelologa, auā o le laumua lea o Savaii, e taulai uma ane i ai auala o femalagaiga, ae ua avea foi ma ogatotonu o nisi o a‘oa‘oga i Salafai.
O lenei kolisi a le Don Bosco i Salelologa sa telē lona faatupeina mai le Salesian Provincial of the Australia-Pacific Province. E tatala le avanoa i lenei Kolisi mo soo se tamaitiiti mai soo se tapuaiga.
O le faleaoga na fausia e le susuga Mosese Tui ma nisi uma lava kamuta i Salelologa ma afioaga tau lalata ane.
