Ua taunuu le tasi o atinae tele a le Ekalesia Faapotopotoga Kerisiano Samoa o le faatūina o se faletelevise ma se leitio faasalalau, lea ua tatalaina ai le faletelevise ua faaigoaina o le EFKS TV.
O se atinae sa faatino lona faatūina ina ia fetaui tonu ma le taimi lenei o le fonotele i Malua lea na amatalia i le vaiaso na tea nei i le fono laititi ae o le vaiaso lenei o le Fono tele.
O le fogafalelua o loo i gauta o le Maota o le Ioane Viliamu lea sa faaaogā e le faalapotopotoga o le malosi tau eletsie le EPC, ua avea ma nofoaga tutotonu o le televise ma le leitio a le ekalesia.
O le faaiuga o le vaiaso na amata maimoaina ai e le atunuu faasalalauga faataitai a le faletelevise lea ua faailoa mai ai le tele o nisi o polokalame mo le maimoaga a le atunuu, e lē gata o faasalalauga faapisinisi, ae o polokalame faalelotu, atoa ai ma ata tifaga ma ata faasolo e pei foi ona maimoaina i nisi o faletelevise i Samoa o loo faagaioia faapisinisi.
O se tasi o tamalii ua tele tausaga o galue i faasalalauga e lē gata o nusipepa, ae o televise le afioga Tuiasau Leota Uelese Petaia, ua tofia e le ekalesia EFKS na te pulea ana atinae tau faasalalauga i le TV ma le leitio.
Ua faaopoopo atu nei le televise a le Ekalesia EFKS i isi auaunaga tau faasalalauga o loo i le atunuu, ma ua tulai mai ai ua
ono faletelevise, tolu ua faagaioia faapisinisi
ma le isi tolu o auaunaga tau i
polokalame faalelotu.
O isi alaata tau televise faaopoopo e aofia ai le CCTV mai Saina ma alaata tau televise e totogi ona faatoa mafai lea ona maimoaina e pei o le Moana TV o loo faagaioia e le kamupani telefoni o le Bluesky, o le SkyPacific, ma le Procom TV o se tautua a se tasi o tamalii o le atunuu le tofa Nuu Tapasu Leung Wai.
E iai nisi o tautua faapenei i le atunuu e lē o toe faia ona o nisi o mafuaaga lē maalofia e pei o le StarTV sa faagaioia mai i Levili, ae na faaletonu talu mai le afā o Eveni i le faaiuga o le tausaga ua mavae.
