E $52 miliona tala le tau atoa o le fale fou o le SNPF Plaza ua fausia nei i Savalalo. E iai le fuafuaga o le a tele nisi pisinisi tau faleoloa ma isi pisinisi faapena o le a latou totogia lenei fale e faagaioi ai a latou pisinisi ma atinae eseese i le atunuu.
E ui lava ua pagatia le atunuu i le tele o mea ua faaleagaina e le afa o Eveni na sei mavae atu nei, ae talosia o le a toe vave ona tulai mai le atunuu ma ona atinae i se tulaga lelei i se taimi vave. I se lauga a le afioga i le Palemia, Susuga Tuilaepa Salele Malielegaoi na ia ta‘ua ai, o le a lē gata ina avea lenei nofoaga, le Plaza e avea ma nofoaga e fai ai le tele o pisinisi a tagata o loo fia faatino ni pisinisi ae lē o maua ni nofoaga lelei, ae o le a atili ai foi ona tele galuega mo i latou o loo saili galuega, aemaise lava fanau ua faatoa uma mai a latou aoga ma faauu mai ma o latou tomai e faatino ai ni galuega.
O se avanoa foi lena na toe faamamafa atili ai le saunoaga a le alii Palemia lona faalaeiau i kamupani ma pisinisi uma ina ia galulue malolosi ma faia i se auala lelei le faatinoga o a latou galuega.
Saunoa Tuilaepa, afai e lē vave ona faagaioi mafaufau o tagata faipisinisi o le atunuu ma faagaioi nisi a latou pisinisi, e iu ina vave mai tagata faipisinisi mai isi atunuu ma fao uma lena avanoa lea sa tatau ona muai maua e tagata faipisinisi o Samoa lava ia.
O le unai malosi lava lea a le Palemia i le lio o tagata faipisinisi a le atunuu, ia galulue malolosi ma galulue faatasi, ina ia mafai ona siitia le tulaga o atinae i totonu o le atunuu lava latou. Sa momoli le faamalo ma le faafetai a le Palemia, i le minisita o Tupe a le atunuu, le afioga ia Faumuina Tiatia Liuga, aemaise foi le Komiti Faafoe a le SNPF mo le faafoeina o lenei galuega atoa.
Ae na toe faaopoopo foi se isi manatu o Tuilaepa, ua tatau foi i le SNPF ona sii sii teisi i luga lana tupe lea e tipi mo tagata faisaofaga mai le 5sene lea ua leva ona iai talu mai le 1972, lona uiga ua 40 tausaga talu ona tipi lava lenei 5sene, ae pe ua lē tatau ona sii loa i luga i le 10sene. Lona uiga e tipi mai le 10sene mai le $1 o le totogi o le tagata faigaluega, ona faaopoopo foi lea i ai ma le 10sene a le SNPF i le 10sene a le tagata faisaofaga.
Fai mai Tuilaepa, e tatou te lē mananao e oo ina ritaea malolo o tatou tagata faigaluega, ae na o le $40,000 pe $50,000 lana saofaga mai le SNPF. Ae tatau ona ritaea malolo ane, ae ua $100,000 pe sili atu sana tupe ua iai o lana NPF.
O le SNPF Plaza fou lea o loo iai pea le faleoloa autū o le Frankies Supermarket, faapea foi le Farmers, le fale faatau telefoni a le Digicel, ma le tele o isi faleaiga ma bar ua faatulaga ai nei.
