Tatala le faaili mālie a le Saint Brothers

O le ‘auga o aute o le malaga mai o le alii pese mai Fiti o Daniel Rae Costello, ina ia silasila foi i ai augatupulaga i nei ona po ma toe faafofoga nisi i ana musika mālie.
O le faamoemoe sa amata mai Sini agai mai i Melepone i le aso (31/5/2013) faasolo mai ai i Brisbane ma faafiafia i le po o le Aso Toonai aso muamua o Iuni i le kalapu a le Acacia Ridge Hotel.
E to‘a sefuluono le aumalaga mai Sini lea sa taitaia mai e se tasi o alo o le atunuu, Faleao Siatua Asiata Frost o ia foi sa fai ma Fofoga o le po.
Na matuai toatele le tupulaga e tolu ma le fā ma tagata matutua e lē gata o Samoa, Toga, Rarotonga ma isi tagata atumotu sa lolofi atu se‘i toe faafofoga pe o tumau pea le siufofoga mālū o le alii pese, ae na molimauina lava e ui ina iai le suiga o ona tauasaga, peitai o le siufofoga e lē o suia lava le logomalie o ana fatuga.
E manatua pea le tele o ana pese e pei o le Dark Moon, Walking to my life, Since I met you Baby, Samba, Moonlight Tango ma nisi lava pese o loo faananau pea i ai le toatele.
Na soifua mai o ia i le tausaga e 1961. O lona tina o Jessie Rae o se Samoa/Rotuma ma le Scottish, a o lona tamā o Dan Costello o le Irish ae na soifua uma a‘e i Fiti. Na tupu a‘e o ia i Tavua, sa o latou umiaina se lafupovi ae na o atu lona aiga i Lautoka faatoa 5 ona tausaga.
Na amataina e ia ma lona uso o Vince le faaili sa igoa o le “The Fleet Swingers” a o iai o ia i le Vasega 7. Na o ane i Niu Sila ma lona uso ma aoaoina i le aoga maualuga i Whangarei. Sa fiafia e auai atu i taaloga lakapi i ia vaitaimi ma avea o se tama taalo tautaua i le Under-17 a North Auckland.
Na toe taliu ma toe faaauau lona tausaga mulimuli i le Marist Brothers High School i Suva. Na ia manumalo i tauvaga taleni a aoga ma maua ai le avanoa e perform ai i Suva Grammar School, o ia o se malo faaaloalogia ma o iina na fetaui ai ma lona faletua o Corrina.
E tele ni faaailoga taleni na manumalo ai ma na avea foi o ia o se tasi i le kulupu a le Beachcomber Island Resort.
O le 1979 na pueina ai lana uluai Solo album ua igoa o le “Tropical Sunset”. Ina ua maliu lona tina i le 1985, sa ia suia ai loa lona suafa ia Daniel Rae Costello. Na malaga mai i Ausetalia i ni nai tausaga auā o le 1987 na tusia ai ana pese e lua o le Samba ma le Take me to the Island seia oo ina toe foi i Fiti ma amataina ai lana ia lava studio ma le Production Suite ma pueina ai loa lana album o le Samba.
O Daniel Rae Costello ua lauliloa o se accomplished songwriter, arranger, audio engineer, vocalist, poo se musician i le vasa Pasefika.