Tatala le faaili mālie a le Saint Brothers

O le ofi mai o le faaili a le Saint Brothers i laufanua o Brisbane, o se fiafiaga sili lea i ai latou o ē fiafia ma fai ma vaisū le saili faafiafiaga e koma i ai le vaivai mai galuega o le faaiuga o le vaiaso.
O le pogai, auā foi e tele faaili e fai ai le latou filifiliga saoloto poo ai e see lelei ai le lue e fiafia ai ma uo ma paaga i le mae‘a ai o galuega. O le afiafi o le Aso Toonai 25 o Me i le itula e tolu na faatasia ai i se taumafataga tele le auvalaaulia ma tatalaina ai le faaili a le Saint Band ae faatoa tatalaina faafiafiaga a le faaili i le 7 i le afiafi.
Na tapenaina le sauniga lotu e le susuga ia Bishop Alema Lealaogata (Ekalesia a Iesu Keriso o le Au Paia o Aso e Gata ai). O le alii pule o le faaili o le afioga ia Matuauto Faaoso Matuauto (Tapueleele).
Taitai faaili o Toa Tuilagi (Fatausi Savaii &Falealili); O le au faaili e aofia ai Setoki Tuimaseve (Salamumu & Lotofaga Safata); Joe (Faleapuna); Faavae So‘e (Samata & Falelima; Tueni Uele (Fasitoo); Neetia Patiole (Safotulafai); Sione Opapo (Manono) ma le susuga ia Taupa‘u Ulalei Opapo mai Manono, o ia foi sa fai ma fofoga o le faamoemoe.
Na molimauina e i latou sa auai le faatumulia o le faamoemoe ona o le logomalie o siufofoga o le aufaaili na fai lea ma faasiligamalosi i le aueva ma le au tifatifa, ae talosia o i latou nei e fiafia e eva, ae faatele lava le fiafia e agai atu i sauniga lotu.
Na mataalia foi le agavaa o le Fofoga o le po (Taupa‘u Ulalei Opapo) i ana saunoaga faalaeiau ao faatautaia le faamoemoe. Ua faamaonia mai lava le saogalemu o faafiafiaga i nei vaitaimi i Brisbane e ala i ni ripoti faamaumauina e tuuina mai, se‘i vaganā ai lava le au faopaga ma le vaega foi lea ua ova ma le faavae le suavai ua taumafaina.
Ia manatua lae faatali mai lau paaga i le fale ae o faafiafiaga ua na o ni evaga e faapasi ai le taimi, a o lou aiga lava e tumau e te maua ai foi le fiafia moni e faavavau.
E momoli le faafetai tele i nai tamalii ma failauga faapea alo o le atunuu o loo feagai pea ma le tausia o le saogalemu i nofoaga faapenei Tautuana outou le aueva faamolemole ia utagia ma manatua lenei faamanatu tāua o le alofa “E te gasegase i le tapaa, e faaseseina oe e le ‘ava malosi, e lelei ona vili le taxi ae aua le faia lou loto ma fosi i le maso lau foeuli ne‘i maimau lou soifua o loo manaomia tele oe i totonu o lou aiga.”
Aua foi le faaseseina oe i le au faasaolo o le po ae toe foi lelei i le fale lae faatali mai Mama ma Papa ma le fanau. Faafetai ma manuia le alo atu i evaga o lenei foi vaiaso! Faifai mālie!