Tatala le Ekalesia Fou, Logan City Community Church

O le afea o Kuiniselani e susuga faafeagaiga mai Ueligitone, Aukilani, Sini ma Melepone, o se mitamitaga foi lea i lenei vaega o le ekalesia a Logan City Christian Community Church i Brisbane, aemaise o aiga ma uo faapea foi le nopia’i ai o Samoa i lenei foi vaega o le kelope, e pei ona feiloai ai i le tatalaina aloaia o le Ekalesia fou i le aso Sa 25 o Oketopa.
O le Ekalesia nei i Logan o loo taitaiina e le susuga i le faafeagaiga ia Sau ma le faletua ia Tuuloa Lologa, i lalo o le faamalu a le Ekalesia Au Uso Kerisiano.
Sa maua se avanoa e auai atu ai le sui o le Samoa Times i Brisbane nei ma molimauina lea faamoemoe. Na taitaiina e le susuga le faafeagaiga a le Ekalesia a le Au Uso mai Waylay i Sydney, Ps Tom Meredith le sauniga.
O nisi o faafeagaiga mai le Ekalesia a le AuUso sa auai e molimauina le faamoemoe ma latou saunia talosaga faamanuia o le susuga Ps Ofisa Jerome ma le faletua ia Torise mai Melepone, le susuga Ps Urima & Tafea Moasegi mai Mangere Aukilani, Susuga Fapene Sola mai Naenae Ueligitone, Susuga Leaula Aufai mai Sydney, susuga Ps Lui & Ane Ponifasio, le faletua ia Lilia Sagala aemaise Ps Luamanu Shwenke ma le faletua mai Brisbane.
O nisi o talosaga faapitoa mo le faauuga ma faamanuiaga o tofi o le susuga i le toeaina ia Levao Segauea & Sepora Fepulea‘i ma le faamanuiaga o le tofi toeaina o Aumau Ta‘ilevao.
O le tatalo faamanuia sa feagai lea ma le susuga ia Rev Tafa Nick Faata‘ape o le ekalesia Nasareta. O le upu folafola mai le Afioga Paia a le Atua sa saunia lea e le Susuga i le taitai ia Ps Lui Ponifasio mai Manurewa Aukilani.
Sa lagona le vevela o le tau i lea aso ma le sasala o le manogi o taumafa, peitai e lei ano i ai tagata ae sioa uma ma alu le talie aua e le gata o le fefiloi o le gagana Samoa ma le Igilisi ae o le agavaa foi o lana auauna i ana metotia na leai ai se isi o le aufaafofoga e lue se ulu ae sei momoli atu le feau taua na malaga mamao mai ai lana auauana.
Na saunoa le susuga i le faafeagaiga ia Ps Sa‘u V Lologa i se lipoti ma se talaaga o le galuega i Logan City ma nisi o molimau o le galuega sa saunia lea e le faletua ia Lilia Sagala, ma faaiuina ai i le faamanatuga o le tino ma le toto paia o Keriso sa saunia lea e le susuga ia Ps Sa‘u.
Na faaiuina le sauniga i se taumafataga matagofie ma le felanulanua‘i sa tapena lava e ekalesia uma sa faatasia i lea faamoemoe ma momoli ai e le susuga i le toeaina malaga mai Ueligitone i Niu Sila, Le‘autuliilagi Vaa Le‘apai se lauga faafetai i le Ekalesia.
Sa mafai ona maua se avanoa e faafofoga ai foi le mamalu o Samoa i lenei itu o le atunuu, i le siufofoga malu o le susuga i le faatonu poo le faafeagaiga ia Ps Lui Ponifasio i luga o le siufofoga o le Penina o Asuisui 1197am e lata i le 30 minute, e pei ona faatalanoaina ai e le Faatonu ia Fiu Tamala Malatai Fiu i ana faasalalauga i le po o le Aso Sa.