Ua amata le tausaga fou, i le osofai malosi mai o se tasi o ata tifaga ua faaigoaina pe a faa-Samoa, ‘Tagi a le Hamo’. O lea ata na pueina lava i Samoa, i se mea moni lava sa tupu i le va o se ulugalii.
O se tasi o alii pese lauiloa i Samoa ma atunuu i fafo i ana fatuga le susuga ia Pauga Tai Logoipule o ia lea o loo taulamua i le tusia ma le tuufaatasia o lenei ata tifaga, ma o ia foi o loo autu i ai le ata. O lenei tala o se mea moni lava sa tupu i le va o se ulugalii i Samoa, o le musu o le tina e nonofo lana tama teine ma le Hamo ae fiafia i le alafau mūmū (palagi) ona e tele le seleni e maua atu ai. O le ala lena ua tagi ai le alafau uliuli ona e lē manao i ai le tina o lana tausala.
O le afiafi la o le Aso Toonai na papa tutu‘i ai totonu o le fale kalapu o le R8 i Magele i le mamalu o le atunuu na agai atu ma lagolago le tatalaina o le ata tifaga fou lenei e pei ona faalauiloa i luga o le leitio i le vaiaso atoa.
O le susuga ia Sive Ualesi ma Faipaua Iakopo sa fai ma fofoga o le po, ma sa faatauina ai foi ma le ata i lea afiafi i le na o le $25.00, auā na o le pau foi lea o le aso na pa‘ū ai le tau. O le faili numera tasi o le Pacific Love o loo faauluulu i le susuga ia Lale Talo ma lona faletua, ua faipaaga nei ma le susuga ia Pauga Tai Logoipule e fesoasoani i le faatauina o le ata i Niu Sila nei aemaise o Ausetalia.
Na faailoa foi e le alii pule o lea faili, o loo iai le faamoemoe mo Kalaiesetete i le aso 6 o Fepuari e malaga ai i lalo e faafiafia ai mo le tatalaina o le ata i le aso 7 ona toe taliu mai lea i le Aso Gafua.
O le fesootaiga a le Pacific Love ma le susuga ia Tai Logoipule, ua fuafuaina le vaega lona lua o le ata e sau e tulituli mai le sosooina o le tagi a le Hamo i lenei tausaga. O le ata o loo maua lava i le faleoloa a le Pacific Love i Magele ma ua faatauina nei i le $30.00.
