Ua amata nei ona faatauina i tua mo le maimoa a le mamalu o le atunuu le isi ata fou ua tatala mai a le kamupani Samoa faiata tifaga, le ETV Productions. O lenei ata ua faaigoaina, “E lelei le Alii” (God is Good).
Autū o le Ata
E tele taimi o le olaga tatou te faatuatuanai ai le tausiga a le Alii, e galo ona tatou tatalo ma faafetaia lona Alofa ona o le poto faaletagata i ona mafaufauga. Ae pe a lutia tatou i puapuaga ma faafitauli o le soifuaga, ona tatou tagi tu‘i lea ma faatauanau le alofa ma le agalelei mai o le Alii.
O le aano lena o lenei ata, i totonu o se aiga sa pogisa le tamā i le agalelei faifai pea o le Alii, seia oo ina afifi mai lona Alofa i aso uma, e auala mai i ona mafatiaga na oo i ai.
O lenei ata o loo faatino e i latou uma lava sa sailia i Samoa mo lenei ata. O le pese poo le theme song, o loo faaaogāina ai se tasi o fatuga a le Maatulua – “O puapuaga o lenei olaga …” o loo usuina e le afioga i le Minisita o Fesootaiga ma Faamatalaga Faatekenalosi, Afioga Tuisugaletaua Sofara Aveau, o ia foi na tusia le pese ma fatuina i le taimi o lona talavou.
Ua mae‘a ona faailoa aloaia lenei ata i Samoa, ma sa auai atu lava i ai le alii minisita ma lona faletua ia Seutatia Solomona-Aveau.
O le susuga i le Sui Palemia, Fonotoe Nuafesili Pierre Lauofo na saunoa i le Upu Autu o le po, ma ia faafetaia ai lenei galuega faigata, e lē taugofie.
Sa saunoa foi le susuga i le taitai o le Itu Agai, Palusalue Faapo II ma ia faapea ai, o le tāua o lenei ata, ua fai ma pine faamau o le faaleagaina o Samoa e le Afā o Eveni, ona o ata o loo aumai ai, o ata moni lava na pue i le aso o le afā.
E le gata i lea o lona faatāuaina o le feau o loo momoli mai ai, ua fetaui tonu ma le Eseta aemaise o faafitauli o lenei talutalu fou.
Ua i totonu nei la o faleoloa lenei ata mo le faatauina atu, ae na saunoa le tamaitai pule o le kamupani pueata le faletua ia Eliza Su‘a-Hunt, ua lē o toeitiiti nei ona amatalia lea o le pueina o le Vaega 3 o le atatifaga o le Silamanino a le ETV Productions.
