Tatala le Aoga Gagana Samoa i Sini

O le vaiaso talu ai na aofaga potopoto ai nisi o le mamalu lautele i Liverpool i Sini mo le faalauiloaina o le aoga gagana Samoa. O le auvalaaulia e aofia ai le pulenuu o Liverpool ia Ned Mannoun faapea le Konesula o Samoa le Tofa Manogiamanu Fonoti Etuale Ioane ma le faletua.
O le susuga ia Ps Laikum na taitaiina le sauniga a o Rev Iakopo Leleimalefaga (EFKS Canterbury) na siitira le viiga ma le faafetai ae lei saunoa le Faatonu o le Polokalame is Ps Asofitu Leatuvao i le auga o lenei aoga.

 
“O lenei faamoemoe na amata i le popolega i alo ma o tatou fanau o soifua ma ola i Ausetalia nei o loo faigata lo latou pueina ma tautatala i le gagana Samoa.”
“O le tofa la a lo matou Ekalesia Aso Fitu ia faaolaola le gagana ia malamalama ai tupulaga nei i taimi o sauniga o loo faasamoa. E lē gata o le malamalama, faitau ma le tusitusi.”
“E lē gata i lea o fesootaiga i totonu o aiga ma va o mātua ma le fanau, ia malamalama ma fefaasoa‘i.”
Na saunoa foi Ps Asofitu Leatuvao o loo iai se fesoasoani a le Matagaluega o Aoga a Ausetalia (DET) o loo sauni mai pe a faamalieina le matagaluega i le gasologa na iai aoaoga i le isi ono masina.
Na faaalia e le tamaitai faiaoga ia Maria Tuitama o le silapasi o loo faaaogā nei e saunia e le matagaluega o aoga ae teuteu e faiaoga Samoa.

 
“E na o Aso Lua mo le lua itula i vaiaso taitasi e faia ai nei aoga mai aoga laiti (primary) agai atu i le tausaga 12.”
“O loo iai le faamoemoe a sologa lelei le tausaga fou pe a toe a‘e aoga e fia faaopoopo se ala o lenei aoga i Seven Hills ma Mt Druitt.”
O se manatu na lagolagoina e le Pulenuu ia Ned Mannoun faapea le Afioga i le Konesula o Samoa.
Muagututi‘a Vailolo Siutu, Rev Iakopo Leleimalefaga, Alalatoa Emani Ps Asofitu Leatuvao, Ps Laikum, Teleiai M Sonny Wilson, Tofa Manogiamanu Fonoti Etuale Ioane, Ned Mannoun (Mayor Liverpool), Maria Tuitama