Ua sili atu i le 20 tausaga le tautua a le aoga a le BEST Training o loo a‘oa‘oina ai soo se mataupu, ae o lea ua toe faalauteleina foi se tasi o ana tautua e ala i le faatuina o le aoga ua ta‘ua o le LOGOS.
O le lala lea o le BEST o le a alo atu i le a‘oa‘oina o mataupu faakerisiano, pe ua faaigoaina o le Pacific Institute of Christian Studies.
O le Aso Fraile o le vaiaso na tea nei, na faalauiloa aloaia ai lea Visiona Fou e ala i se sauniga na faia i Manukau.
O le matua tauave ma le faamoemoe o le iai lea i tagata aooga o le malamalama ma ola i le olaga kerisiano i se auala e maua ai se aafiaga mo le lelei o le komiuniti lautele.
O lea tofa mamao o se miti ua 18 tausaga o taumafai i ai le susuga i le faafeagaiga ia Alesana McCarthy. Na saunoa fiafia le tamaitai Faatonu Sili, Anita Finnigan, o le BEST Training, ma ia ta‘ua ai lona fefe ma le popole ina ua talatalanoa atu le susuga ia Alesana e fia faatuina se aoga e a‘oa‘oina ai le Tusi Paia.
O le tausaga fou la ua faamoemoe o le amataina ai lenei aoga i mataupu e sefulu ma le tasi.
O nei mataupu e aofia ai le Mataupu Silisili, Ta‘ita‘i Kerisiano, Misiona, Faafailauga, O le silasila faapasefika i le faatuatua Kerisiano, ma le tele o isi mataupu.
Na ta‘ua e le susuga ia Alesana le tāua tele o le a‘oa‘oina o le Upu i olaga o le fanau talavou, o le talitonuga o le a avea lea ma ala e suia ai ma iu ina lelei.
E toatele nisi o faifeau ma faletua sa auai i le faamoemoe ma e iai le manatu o le a faapea ona faamanuia ai foi ekalesia auā le aotauina o faifeau, tiakono, faievagelia ma i latou o loo taitaia Ekalesia. Sa matuā faamalieina le auvalaaulia i le matagofie o taumafa ma faafiafiaga o lea po.
O le susuga i le faafeagaiga Rev Alesana McCarthy o ia o le Taitaifono o le Komiti Faafoe o loo faauluulu i ai lea faamoemoe, faatasi ai ma sui o le komiti faafoe, Ps Kathy Collins, Martha Farmer, Rev Talosaga Su‘a, Rev Elder Autofaga Lemuelu, ma Ps Lemalu Hermann Retzlaff.
