O le aoga lona lua lenei a le afioga ia Tofilau Malelega, ma le afioga ia Tauiliili ma o la alo.
O le aoga amata fou ua faaigoaina lava i le suafa o le tina sa gapatia ma lē mālōlō i le ao ma le po i le sailia ma le galueaina o se manuia o fanauiti ma lo latou lumanai i le tulaga o a‘oa‘oga.
O le igoa Malelega, o le suafa muamua lea o le tina, ae sa mafua mai i se tala faa-Samoa ma le afioaga i Iva i Savaii.
O le faleaoga fou ma le nofoaga fou i Magele e pei ona tatalaina i le Aso Faraile na tea nei, aso 11 o Mati, o se vaega tupe sa faamatuuina e le malo e tusa ma le 1.2 miliona tala, ae tusa ma le $50,000 le sao o le aoga amata sa tapenaina mo lea lava faamoemoe.
O faiga masani lava ia, e mafai ai ona tuuina mai fesoasoani a le malo mo atina‘e ma aoga amata.
O sui o le malo sa auai o le afioga i le tamaitai Minisita o tagata atumotu, Georgina Te Heu Heu, sa fai ma fofoga o le malo. O le afioga i le alii faipule o le itumalo o Magele, le tofa ia Su‘a William Sio, sa auai foi, ma sa fai ma sui e tali fuaitau i le afio mai o le sui o le faigamalo a le National, Georgina Te Heuheu.
Sa logomalie le lauga a le tamaitai Minisita, ona i se vaega o lana lauga sa ia faafetaia ai le afioga i le faipule o Magele, ona o le tele o atina‘e i totonu o le itumalo mo le vaitaimi nei. Sa ia ta‘ua foi o Magele ua foliga mai o nofoaga ua fai ma masani a lona sui, ona asiasi mai i ai faatele, ona o le tele o atina‘e faapea ma sauniga tetele mo tagata lautele o loo faia ai.
O le ta‘ua e le Minisita o atina‘e i totonu o le itumalo o Magele, sa avea ma auala na ia faamalosia ai tagata o le itumalo, ina ia lagolago malosi mo le faipule le tofa Su‘a William Sio.
Sa toe tatope ane nisi faaupuga a le Minisita e tau teuteu ai lana saunoaga, ona o le popole i le tulaga o polokiki. E foliga ua ia faia se faatosina mo Su‘a ma le vaega faaupufai a le Labour, a o ia o le National.
Peitai e manino le uiga loloto o lana saunoaga, sa tautino mai lona fatu, e lagolagoina le sao o le alii faipule o Magele, ona o le atina‘eina o tagata Pasefika ma le itumalo.
Sa ia ta‘ua foi e faapea, e ui lava ina masani ona fusu i upu ma tala ma le faiva o mafaufauga, ma le afioga ia Su‘a i totonu o le Palemene, peitai e lē aveesea ai lo la sootaga ma le piitaga o laua uma o tagata Pasefika. O lea sootaga e sili ona vavalalata tele, ma e lē mafai e se isi ona vavaeina.
Sa faamālie foi ona tali i ai le afioga ia Su‘a W Sio, i le saunoaga matagofie a le tamaitai Minisita o Georgina. O se vaega o le saunoaga a Su‘a, sa ia faafetaia ai le afioga ia Tofilau, ma le tamaitai pule o le aoga, Tiana Lolesio, ona o le agaga sailimalo, ma le taumafai i atina‘e manuia mo le fanau laiti.
E lē gata i lea, o le sao foi o faiaoga ma mātua, ma le pulega o le aoga ona o le galulue malosi ma le lē faalogologo tiga mo le galuega tele ua tino mai.
O lea lava aso sa auai foi se tasi o Faufautua le susuga ia Alf Filipaina e fai ma sui o le pulenuu ma le pulega a Aukilani le Super City. O sui o le Matagaluega o Aoga ma le tele lava o isi malo faaaloalogia sa auai e molimauina le faamoemoe o le aoga amata o le Malelega a le Toelau i Magele.
O le susuga ia Pastor Luka Robertson sa tatalo e amata ai le polokalame o le aso, ma sa toe tatalo foi mo le faaiuina.
O le susuga ia David Vaafusuaga, o se tasi o alo o le afioga ia Tofilau, sa fai ma fofoga o le aso, a o le tamaitai o Tiana Lolesio, o se tasi foi alo tamaitai o le tina ia Malelega, sa faafeiloaia le au valaaulia.
O tapenaga a le fanau e ala i pese ma siva, sa feagai lava ma alii ma tamaitai faiaoga. O i latou lava foi sa nafa ma faafiafiaga i lea lava aso. Sa fesoasoani ane foi i ai le aoga amata a le Puna o le Atamai, o le uluai aoga lea a Tofilau ma le aiga.
O le fesoasoani malosi a mātua ma aiga o fanau o loo i le aoga, sa tele foi se sao mo le faaleleia atili o tapena o le aso fiafia o le aoga.
O le Malelega a le Toelau, sa fanau mai i le Puna o le Atamai Aoga Amata i Magele lava. O le aoga muamua lea sa faavaeina foi e le afioga ia Tofilau Malelega ma lona aiga. O le tupu ma le agai pea i luma o lea foi taumafaiga, na avea ma auala o le toe tatalaina ai o le faitotoa mo le aoga fou e pei ona tatalaina.
O totonu lava ia o le faleoaga, ma lona faatotogaina, e maoae lava foi le vaaiga, ona o le anagata ma le taugata, aemaise o le mautu lelei o vaega e faaaogāina mo aoga a le fanau.
O se saunoaga a Tiana o le pule o le aoga sa ia ta‘ua ai, sa ia taumafai malosi lava ina ia saili mai meafaitino anagata e fetaui lelei ma le fanau. E moni lava e taugata, peitai e umi se taimi e faaaogā ai, ma e faigata foi ona leaga auā o tamaiti ma fanauiti, ua silafia lelei lava a latou aga ma faiga i soo se mea e vaai i ai.
O se fale ua matuā matagofie ma lava tapenaina mo aoga a le fanau, i le anofale faapea foi ma fafo i le lotoā, ma isi foi meafaitino o loo iai.
E limasefulu tamaiti aoga o loo lesitalaina ai le aoga a le Malelega a le Toelau. O faiaoga foi o nisi ua mae‘a ma saunia lelei, lava le tomai ma ua faauuina foi mai aoga faapitoa auā le a‘oa‘oina o le fanau.
Faamanuia atu foi le Samoa Times, mo le afioga ia Tofilau Malelega, tamaitai pule Tiana Lolesio, o faiaoga ma mātua mo le taumafai, ma le nofoaga fou ua tatalaina.
