Lē solomuli le taumafai mo pisinisi atia‘e, tautua Tagaloa & Sons Ltd mo le faatauina atu o taavale
E ui ina tulaga faaletonu pea le tamaoaiga o le lalolagi ma o loo aafia tele ai ma Niu Sila, peitai e lē mafai e lea faafitauli ona taofia ai le manatu ma le finagalo saili malo o tamalii ma tamafanau a Samoa.
O le afioga ia Tagaloa Fiafia Manase, o se tasi o tamafanau a le atunuu ua leva ona tautua ma auauna mo le mamalu o Samoa ma tagata lautele, i le maketi o taavale, ma le faatauina atu.
E tele tausaga o faia pea ma faataunuuina ia tiute ma lea galuega, peitai e lei leva tele atu ona ia amataina ma see ane e faatautaia lana lava ia kamupani faatau taavale.
O se faiga faapaaga ma se tasi o alii Initia, i ni nai taimi ua tuanai, peitai sa lē mafai ona toe faaauauina ona o le tulai ai o ni faafitauli.
E ui ina tele ni tupe sa gau ma leiloloa ai, peitai e lei muta ma nofo ai le agaga taumafai ma le fia atia‘e pea mo le lumanai.
O le ala lea sa lē mafai ai ona vaai i le faafitauli, ae sa taulai pea lana silasila i le atina‘eina o lona valaauina ma lona tomai ua foai mai mo ia.
Ua toe tatalaina nei le auaunaga ma le tautua a le afioga ia Tagaloa Fiafia Manase i Papatoetoe i Aukilani i Saute.
O se nofoaga ua lava saunia ma tapenaina e lē gata i taavale ua i luga o le lotoā, ae faapea foi le tele o isi vaega mo le faalauiloaina ma le va ma tagata faatau.
O totonu o le nofoaga e mālōlō atu i ai le au faatau, ua mae‘a ona faapipiiina ai televise lapopoa e lua.
O le faamoemoe o le alii pule, ina ia aua ne‘i motusia le silasila ma le tagai pea i ai o i latou e agai ane i totonu o le lotoā, i le tele ma le anoanoai o isi taavale e mafai ona faatino i ai le auaunaga a le Five Stars, e tali ai manaoga o le au faatau.
O le agaga moni o le susuga i le alii faatonusili, o ia lava foi e onaia lea kamupani, o le fia faatumauina pea o fesootaiga vavalalata ma tagata o lona lava atunuu e ala i le tautuaina, faapea tagata lautele.
O se lui ua leva ona nofo ma mafaufau pea i ai i le tele o taimi, a o galue ai ma auauna i nisi o kamupani a papalagi ma Initia.
O le afioga ia Tagaloa Fiafia Manase, o ona mātua e mai le afioaga o Saleaula ma Salelavalu i le motu i Salafai.
O lona tamā o le Saleaula, peitai e tupuga mai i le aiga o Le Mamea i Lefaga, a o lona tina o le Auelua mai le afioga i Lepa i Aleipata.
Na faamaonia mai e le afioga ia Tagaloa, ina ua feiloai ma le Samoa Times, lona fiafia tele ma le faamaualalo, ina ua mafai ona taulau o lona taumafai e ala i le galuega ua tulai i le taimi nei.
Sa ia ta‘ua foi o le amataga o le pisinisi e lē faigofie, peitai, e tatau lava ona iai sona amataga, ma mautu lona faavaeina, ona tulituliloa lea ma galue agai i le sini ma le autū sa mafua ai ona faia.
E lē o le faatauvaga ona faia e manuia ai, a o le faia ma le loto maualalo, ma le faamoemoe i le Atua e fesoasoani mai i le taumafai vaivai, atoa ai ma le lagolago a le atunuu, o le a manuia ai e pei ona saunoa i ai Tagaloa.
O le 26 Rangitoto Road i Papatoetoe tuai i Aukilani i Saute, ua tatalaina ai le Five Stars Motors, poo le Tagaloa & Sons Ltd, ma ua sauni e faafeiloai le agai ane o le mamalu o Samoa ma soo se tasi e faatino i ai le tautua ma le galuega.
O le telefoni e maua ane i ai mo fesootaiga ma faamatalaga o le 09 277 7989 ma le 021 167 3345.
O le afioga ia Galumalemana Tai Galumalemana, ma lana kamupani o le G-Mana Wholesale Autos, o le tasi o tamalii Samoa ua loa ma o loo faagaioia lea lava ituaiga pisinisi, ma o lea ua piiama nei i ai ma le afioga ia Tagaloa Fiafia Manase, ma lana foi auaunaga le Five Stars Motors, o le isi foi tamalii Samoa.
Ua totoe nei na o laua tamalii Samoa, i Aukilani i Saute o loo galulue ma faatinoina le faatauina atu o taavale, e ala lava ia laua kamupani.
E ese mai i le susuga ia Henry Schmidt ma le susuga ia Phillip Moore o loo i Grey Lynn, i Aukilani Tutotonu.
O le naunautaiga ia maua pea ma lagona le leo o tagata Samoa i soo se auaunaga, ma soo se pisinisi i totonu o Niu Sila, i le agaga saili malo ma le taumafai. Atonu o le a manauia taumafaiga a nei tamalii Samoa, ona o le lagolago ane i ai a tagata lautele, ma le mamalu o Samoa i Aukilani.
