Na uigaese le suifefiloi ma le matagofie o le vaaiga na oo i le afiafi o le Aso Tofi, aso 3 o Me na uluai taunuu ai le tusitala i Brisbane.
O le toatele o le tupulaga ma ē uma sa gauai loto ma agaga i le aave o tala o le tusi ua igoa o le Telesa, na olioli ma faafetai auā na maua se avanoa e faatauina ai ni kopi o lea tusi e pei ona lausilafia.
Na matuai faatumulia i le au matutua aemaise le tupulaga talavou ona sa feiloai atu ai i le tamaitai tusitala o Lani Wendt Young i le Logan Campus University.
E le gata i lea o alo o Samoa o loo taaalo i aulakapi i totonu o Ausetalia e pei o le susuga ia Digby Ioane ma nisi o tama taaalo. Sa lei mafai ona auai uma le toatele peitai na maua se laolao faaauro i le taeao o le Aso Faraile e afea ai le faleoloa lauiloa o le Runik Polynesian Town i le nofoaga o Inala, ma faapea ai ona taulia le tele o tusi.
O le susuga ia Nikolao ma le faletua ia Ruth Burgess faapea le nofoaalo ia Kirsty ma Daniel sa fesoasoani i lea faamoemoe ma le lagolago a Alice Burgess i le pisi tele o lea taeao a o sainiina nisi tusi a le tamaitai o Lani.
E ova atu i le luaselau (200) tusi na mafai ona faatauina i Brisbane e aofia ai ma le Galu Afi.
O lea lava asiasiga a o iai i Brisbane na mafai ona asia ai nai vaega o aoga i le itu i Sisifo ma Saute o Brisbane ma talanoa atu ai i nisi tamaiti, e faatatau i le avea ma alo Pasefika.
Na ia luitauina ai le taumafai e ausia se miti e ala i le filigā ma suesue atili ina ia tini lau o taumafaiga.
Sa momoli le agaga faafetai o Lani i le lagolago a le mamalu o Samoa uma i Brisbane i lana faigamalaga, faapea le susuga ia Nikolao Burgess ma le aiga.
