“O e uma ua tigaina i le fia tausami, afe ane ia DR Fobby”
I lenei vaitau o loo taua ua faaletonu le tamaoaiga, e le gata i le toatele o tagata o loo saili galuega ae o le tapunia foi o le tele o kamupani ma falefaigaluega, ae o loo mafai lava e nisi o tamafanau a Samoa, ona atiae pea ma amata nisi o tautua faapisinisi.
O le Aso Toonai na sei mavae atu nei, 13 Fepuari 2010 i le taulaga faatau o Aranui i Kalaiesetete, na tatala aloaia ai se tasi foi o pisinisi fou e faatauina ai mea taumafa ua faafoeina e o tatou lava tagata, ma o se mitamitaga foi i lea pitonuu aua e toatele le mamalu o le atunuu o loo alala ma afifio ai.
Na uluai tatala le faleaiga o le DR Fobby Samoan Cuisine i le 8.00am, o se taeao segisegi ma le manino, ma amatalia i le sauniga puupuu o le faafetai i le Atua na taitaia e susuga i alii faifeau Rev Lapana Faletolu ma Rev Robin Walsh mai le St Pauls Pacific Trinity Church. Na maea sauniga o le momoli o laau i Fogaa, ma faapena ona molimoli atu se meaalofa mai le mamalu o le aiga mo alii faifeau ia ona tuumuli lea, ae alo atu mo le faatauina o mea taumafa ina ua ta le 10am, talu ai ua lolofi atu le mamalu o le atunuu sei maimoaina lea auaunaga fou aemaise o le fia sailiili i tofo eseese o taumafa manogi.
O lenei faleaiga fou ua fausia mai i totonu o se auaiga mai le afioaga o Fagamalo i Savaii, le Tofa Tuipoloa Tuese & aiga, faapea Tuipoloa Tulia & aiga, o le afio i le aiga sa Peseta, afifio mai nofo matua, afio foi le Maopu ma le usoalii o Lealamanu‘a ma le mamalu ia te oe Matautu o le muaau e tasi o Pule e ono i Salafai.
Na faaalia e le tamaitai pule o Rebecca Kotzikas, o ia o le alo o Tuipoloa Tuese ae ua faaipoipo atu i le alii o Emillos Kotzikas mai Eleni (Greece) i le tusitala e faapea, o lenei faamoemoe sa fauao faupo ona e le faigofie lona faatinoga aemaise o fatufatuga o lagona ma le faataunuuina, ae na te faafetaia le alofa ma le musumusuga a le Agaga Paia o le Atua, faatasi ma le lagolago a si ona toalua pele o Kotzikas, ma lona auaiga ua mafai ai ma tini lau o le faamoemoe.
O lona soa lagolago malosi, o le tamaitai lea o Debra Tulia, ua tuua lava lana galuega i le faletupe BNZ, ae tuu mai lona tauau e tauave faatasi le la galuega, ma o nei tamaitai e lei taitai o la soifua, e iai le lagona e tele ni sosia ma agavaa o loo ia te i laua mo le faaalualuina o le pisinisi aemaise nisi auaunaga taua mo le atunuu.
E molimauina e le tatou nusipepa le matalasi ma le matagofie o mea taumafa o loo kukaina ai aemaise o le mamā i le itu tau soifua maloloina, o le tusiaina o le lisi o mea taumafa mo le silafia e le atunuu (menu), o loo faavasega ma tuu faavaega lelei mo le manino i le faitau, ma ia faigofie ona malamalama poo fea tonu le vaitamini e aoga i lou soifua. Soo se ituaiga taumafa Samoa, aemaise le seki o le tama o ulupuaa, ia ua uma le case.
E amata mai lava i lau malu o le taeao, aiga o le aoauli ma le afiafi, aemaise nai suafai, koko Samoa, soo se ituaiga masipopo faatasi ai ma le faamamafaina o le vaipuna o le ola, e lelei lena e le oso ai se toto maualuga.
Na taua foi e Rebecca o loo latou kukaina mea taumafa e aoga mo uso palagi na malaga i Samoa, e aoga lea ina ia le motusia lo latou fia tausami pea i taumafa a le atunuu, na maitauina e le tusitala nai uso palagi ma Maori sa faatau ai i lea aso tumu, aemaise le alii aoga Iunivesite o Nathaniel Seiva na ia faalogo i luga o le pasi o talanoa tagata i le DR Fobby ma tope mai loa e faatau lana taga masi ma le ulo sapasui.
E tatala le faleaiga mai le Aso Lulu seia oo i le Aso Sa ae malolo i aso e lua, o mataitusi e lua o le DR o amataga na o suafa o Debra ma Rebecca, ma o i laua foi na o fomai o le soifua maloloina e ala i taumafa, aemaise taumafa o le mafaufau.