Tatala faitotoa o le Apia Park ia Setema

O le isi lea aseta a le Malo na faaleagaina i le taimi o le Afā o Eveni, o le malae o taaloga poo le Malae tutuu e pei ona masani ai le toatele, le Apia Park. Ae o lea ua maua mai le faamautinoaga, ua toe o ni masina ona tatala loa lea o faitotoa o lenei malae mo le toe faaaogāina.
O se faamatalaga lea mai le pule sili o le Pulega o Malae ma Fale mo Taaloga a le atunuu, le afioga Moefaauo Salale Moananu.
Ua uma ona toe faaleleia le itu tau eletise i totonu o fale ma ofisa o le malae, faapena foi i le laufanua ua mae‘a ona toe teu lelei ma faalaugatasi.
O le tetele o tafega i le taimi o le afā na matuā lolovai uma ai lenei malae taalo, ma faaleaga ai le mutia, ae o lea ua toe ola lelei le mutia ma toe teuteuina lelei. Ua uma foi ona toe faaolaola lelei vaega o le malae o loo vali mo le faatulagaina o taaloga, o mea uma na sa matuā faaleaga uma e tafega.
E iai le faamoemoe e tatau ona oo atu ia Setema, i le taimi o le faaiuga o taaloga a le Iuni lakapi a Apia, ma ua fetaui ai foi ma le taimi o taaloga afeleti a aoga.
Saunoa atili Moananu: “E tusa ma le $500,000 le seleni ua uma ona faaaluina mo mea toe faaleleia i le malae, ae e iai le faatalitaliga e oo atu lava i se mea pe tusa ma le $1.2 miliona e faaalu pe a oo ina matuā faamae‘ae‘a uma galuega.
Ta‘ua foi e Moefaauo, ua uma ona faataatia se talosaga a le malo i le faigamalo a Saina mo se latou fesoasoani i le toe faafouina o malae uma ma fale o taaloga mo le sauniuni atu i Taaloga a Talavou o Malo o le Taupulega (Commonwealth Youth Games) i le tausaga 2015. E tusa ma le 54 atunuu o le a auai atu i na taaloga, lona uiga o se taimi muamua lenei o le a talimalo ai Samoa i ni taaloga tetele. Ma e iai le faamoemoe ina ia oo atu i lena taimi ua mae‘a uma ona faaleleia ma tapena mea uma mo le faatinoga o na taaloga.