Ua taunuu nei i Apia le vaega lea sa ofoina le fesoasoani, mo fofo o le tino atoa ai ma aafiaga o le mafaufau, e faapitoa lava mo i latou sa matua aafia tele talu mai le galulolo sa afaina ai le atunuu i le tausaga talu ai.
E tusa ma le 40 tagata o Samoa lava latou o loo sauni nei mo aoaoga faapitoa, e saunia lava e le au malaga mai Niu Sila sa malaga atu mo lea faamoemoe.
O lea vaega sa malaga faapitoa e tali atu i le manaoga o le Matagaluega o le Soifua Maloloina a le atunuu, mo le fia maua o se fesoasoani mo i latou tonu lava o loo aafia pea i tiga o le tino, aemaise ai o le ootia pea o le mafaufau ona o le faagalogata o i latou e pele, aemaise o fanau, matua ma aiga, sa faafuasei ona toesesa i le maliu, ona o le faalavelave sa feagai ma le atunuu ia Setema o le tausaga na tea nei.
O se vaega faapitoa lava mo le togafitia o lea foi ituaiga faafitauli, o ni tagata sa aoaoina faapitoa mo tomai ma agavaa mo fesoasoani faapea.
O i latou foi ia sa fesoasoani tele mo atunuu eseese o le lalolagi pe a faatagisia mai lea lava ituaiga fesoasoani.
O le mataupu lenei sa uluai lomia foi i nisi o a tatou lomiga muamua o le masina na tea nei, aemaise ai o luga o tala fou a le Radio Samoa, a o fuafua ma tapena le vaega lenei mo Samoa.
O le Aso Lulu na tea nei i Samoa, na saunoa ai le alii palemia, Tuilaepa Lupesoliai Aiono Sailele Malielegaoi, e le gata ina tatala aloaia ai fuafuaga ma aoaoga ua amataina i le atunuu, ae sa ia saunoa ai foi ma toe saga faamausali le uiga ma le tāua o le galuega a i latou sa malaga atu i Niu Sila nei mo lea lava faamoemoe.
Saunoa le alii Palemia, e moni lava sa muai maua atu le tele o le mau fesoasoani mo tagata sa matua aafia tele i le galulolo, ma o galuega uma sa faatino ma auauna ai i le mamalu o le atunuu e fai ma faamama avega mo i latou ia.
Ae peitai sa maitauina, e ui lava i le mau galuega lelei sa faia ma feagai ai ma le toatele, ae sa le mafai ai ona faamalieina le loto mafatia, ma le mafaufau le mautonu ma le fememeai, ona o le oona o le toesea faafuasei e ala i le maliu ma le oti.
Sa taua foi e Tuilaepa, o loo faaauau pea ia lagona tiga ma le mafatia, e le gata i le tino, ae sili lava i le loto ma le mafaufau i nisi, ma le toatele sa afaina, ma o le ala faafetaia lea o lenei auaunaga ua taunuu i le atunuu, ma e manatu o le a faaaoga tatau le avanoa ua maua, ona e le faigofie le galuega ua malaga atu ai i latou mai Niu Sila.
O aoaoga ua faagasolo i Samoa, o loo aofia ai nisi o matagaluega a le malo ma faalapotopotoga tumaoti, e pei o le Samoan Lifeline, Samoan Victim Support, Ministry of Police and Prison, UNDP, (United Nations Development Programme), UNESCO ma isi, aemaise lava le iunite a le soifua maloloina i le auaunaga mo gasegase o le mafaufau.
O loo iai le faamoemoe o le vaega faapitoa na malaga atu, afai ae mae‘a ma faaumaina aoaoga o loo faagasolo nei i Samoa, o le a toe taliu mai, peitai o le a toe sauni le isi malaga e tuliloa ai le galuega a i latou o le a faaauauina lea fesoasoani, ina ia mautinoa, o loo solosolo lelei ma maniua pea le faataunuuina o togafiti ma fofo mo tagata sa aafia ma manomia ai le fesoasoani.
O le toe taliu mai o le vaega lea mai Samoa, o le a faapea foi ona iai nisi o a latou tapenaga, mo le agai atu i Amerika ma isi atunuu o le lalolagi, mo le ofoina atu o lea lava foi auaunaga ma lea fesoasoani.
O le a aofia ai i tapenaga uma nei, nisi o suesuega ma sailiiliga mao le 9 i le 11 isi galuega o loo faatalitali mo le vaega faapitoa lea o loo i Samoa i le taimi nei.
