O le tele o fita ma faigata o saputu mai i lenei soifuaga o tatou o ola ai nei, o taua ma fevaevaeaiga, o mafuie, afā ma lologa o mea ia ua loa ona valoia mai e le Tusi Paia: “E faalogo outou i taua ma tala o taua; ia outou nei tou atuatuvale; aua e ao ona taunuu o nei mea uma”.
O le itu lelei lea ma le aogā o le galuega laveai a auauna paia a le Atua ina ia saga fafaga pea agaga o le lafu mamoe ma faailoa atili mai mea e ao ona oo mai ina ia nofo sauni i ai tagata uma.
O le tau logologo mai o le Afioga Paia a le Atua e mautū ai ma mauaa le faavae o le soifua auauna o le tagata.
E pei la ona faagasolo ai foi le aotauina o nisi o le fanau a le Atua ina ia silafia atili pea le Atua ma lana faaolataga, aemaise ua pa‘e le saito ae ua toaitiiti le aufaigaluega.
Ua toe amatalia nei le aoga faale-Tusi Paia a le Kolisi ua igoa “Ia Malamalama Agape Bible College” i Brisbane.
O le susuga lava i le puleaoga ia Dr Peniamina Williams na malaga mai i Niu Sila auā le tatalaina o le uluai mataupu o lenei tausaga 2011.
O lea la ua amataina le tausaga muamua faatasi ma nisi o loo faaauauina le tausaga lua, e pei ona amata mai i le tausaga na se‘i mavae atu nei.
O le malaga mai la o le alii Fomai ia Dr Peniamina Williams, ua lē gata i le tatalaina o le aoga mo le 2011, ae ua maua ai foi le avanoa na te a‘oa‘oina ai le uluai mataupu mo i latou ua sauni atu mo le sueina o le faailoga o le BA i lenei tausaga.
Ua maitauina le faaopoopo pea o le aoga i le taimi nei i nisi o sui fou faapea i latou sa iai pea i le tausaga ua mavae.
O se tasi vaega tāua, o le tausaga foi lenei ua see atu le Kolisi i lona faleaoga fou e pei ona amata faatautaia ai nei a‘oa‘oga i lenei tausaga.
Ua iai pea le manatu o le faiaoga ulu ma le ofisa ina ia galulue faatasi auā le manuia ma le alualu i luma o le aoga, ma ia sologa lelei le gasologa o lenei foi tausaga.
