Tatala DVD a le Tupulaga Talavou EFKS Faatoia

E galo uma tiga pe a taunuu ma le manuia i le sini na tulimatai, se moemitiga sa tele ni aso o taumafai mai. O lagona na o le fiafia i le tupulaga talavou o le ekalesia EFKS Faatoia, ina ua tino mai le DVD sa tuufaatasia, i le afu lelea, e tagi i lima, e punouai ma le tatalo lē leoa a ona taitai ma tulaga tofi, a o le pati taoto o le tapuaiga a nai tuaa sinasina, ina ia iai le faamanuiaga a le Atua e faataunuu ai le faamoemoe.
O le Aso Toonai na tea nei, na tatala ai le DVD a le Tupulaga Talavou EFKS Faatoia i le fale faafiafia o le Apia Way i Magele. O le faamoemoe o lenei DVD o le tuufaatasia lea o le tele o siva a le autalavou aemaise le tala faatino e faatatau tonu i le olaga o tupulaga talavou, o a latou faafiafiaga sa pueina i le tausaga ua mavae, i faaaliga e lua sa faia i le GYM i Tuanaimato. O le tuufaatasia o nei faafiafiaga, o le fia saili fesoasoani i se seleni ma tuutuu tau‘au e faamāmā avega atu i mafatiaga na aafia ai le afioaga faapea le ekalesia i Samoa, talu le afā o Eveni. Sa maitauina le faatupulaia o le taleni o loo faa‘oaina ai le tupulaga talavou a le afioaga o Faatoia, i siva ma pese faitaga, o tāga faaonaponei, e faatinoina ai le faasinomaga, o matafaioi, o le alofa, faapea ma siva Samoa. E tolu itula o lenei ata ma e lua DVD i totonu o le ata e tasi.
O sui o le mafutaga o le afioaga o Faatoia, o loo nopiai ma alala i Niu Sila nei, na faatautaia le tuufaatasia o lenei faamoemoe atoa, peitai na malaga faapitoa mai foi nisi o le komiti a le autalavou mai Samoa e auai, e aofia ai le afioga i le peresetene, Papalii Pene Saveaalii Malietoa, o le taitai o Taupaū Ioane Ualei, o le failautusi Melissa Naseri, o le teutupe o Magalo Solinuu faatasi ma nisi o le komiti faafoe, Fale Soke ma Alovale Bentley Malua.
E toatele le mamalu o le auvalaaulia aemaise le afioaga na lagolagosua faapea le lagolago a le mamalu o le atunuu na fesoasoani i le tatalaina o le faamoemoe. O le ekalesia EFKS Faatoia o loo taitaia lea e le susuga i le faafeagaiga Rev. Dr Paulo Koria ma le faletua ia Mafutaga Koria.
O le afioga Vaaelua Mulitalo Sailo Tulifau sa avea ma Fofoga o le po, o ia foi sa avea ma taitai aoao o le autalavou i tausaga ua mavae, peitai o loo faamautu i Niu Sila mo aoaoga ae fesootai i ai mo nisi o faamatalaga ma nofoaga e maua i ai le DVD. Valaau le 0211350651 pe imeli whanaufaatoianz@gmail.com mo nisi faamatalaga.