O le tausaga e 1997 na amataina ai le faaili lauiloa i Melepone o le New generation, e pei ona tautua ai se tasi o tamālii ua iloga foi lona tulai mai i le faamaopoopoina o musika a alo ma tamafānau a Samoa i le muskia.
O se tasi lenei o faaili e mautinoa le faamalieina ai o le tafafao a le au eva e faagalo ai vaivai o galuega o le vaiaso.
O le afioga ia Lupematasila Levae mai le alalafaga o Falelatai, e alaala i Melepone. I le tulai mai foi o lenei tamālii, e uigaese le mālie o ana fatuga faapea le paleni lelei o le sekiina o vaega uma auā le pueina o CD pese a soo se tasi.
Na faatuputupulaia le taleni ma filifili ai loa le susuga ia Lupematasila Levae i le tausaga e 2001, o le a faia sana falepuepese ma ia faaigoaina ai o le “Fiafia Recortz” e pei ona silafia e le tele o alo o Samoa e malaga mai ma faatalosagaina le fesoasoani a lenei tamalii.
O le faaili a le New Generation o loo taitaia lava e le afioga ia Lupematasila Levae faatasi ai ma le ‘aufaaili, Samuelu Levae, Tinei Levae, Keilani Kiliva, Sam Feo, Tina Vaasili ma le susuga ia Sitivi.
O le CD la sa faalauiloa i le po o le Aso Toonai, aso 11 o Tesema, sa auai ai ma i latou o loo iai a latou fatuga i totonu o lenei CD, ua na o ni pese suifefiloi.
O le faamoemoe maualuga sa tuufaatasia ai e Lupematasila lenei CD, ona o nisi o le au pepese e leai se avanoa e pueina ai ni a latou CD, o lea ua tuufaatasia ai e lenei tamalii ma faaigoa ai le CD o le FOB SHOP o le MIX auā e lē na o lona siufofoga i totonu o le CD ae aofia ai ma nisi.
O le tatalaina o lenei MIX sa mafai ona faatasi mai ai foi le susuga ia Atofu ua lauiloa i le “KING FAIPOPO”.
Saunoa Sila Levae, e lē o iai se agaga ia te ia i se tupe, ae o lona faamoemoe ia mafai ona faafiafiaina nisi foi ua amata ona faamanuia e le Atua e ala i lenei taleni o le pese.
O le faleaiga lauiloa i Melepone, le Pacific Flavour, a le susuga ia Faasavalu Semu ma le faletua ia Lusia, sa tapenaina le fofoga taumafa o le faamoemoe.
E 16 pese i totonu o le CD, ma e mālie tele fatuga o lenei CD fou, auā e eseese ona nota ma e logo mālie i lau faafofoga i taimi uma e te mafatia ai ma tele mai ai fita o le olaga.
