Tatala CD fou “Le Alofa Faatinoina” – Pagamalie Iopu Fa‘ivalu

O loo olaola pea le taleni pese a se tasi o tamalii pese ua iloga foi ana fatuga i totonu o le atunuu, le tofa Pagamalie Iopu Fa‘ivalu, e pei ona amata mai le aufaipese a le Tiamaa mai le afioaga o Toamua i Faleata; i le taimi nei o loo faaauau mai e Iopu le taleni, ma ua pepese faatasi ai foi i nisi taimi ma si ona alo le tamaitai o Jennifer Filitaa Victoria Fa‘ivalu.
O le afiafi o le Aso Tofi talu ai, na tatala ai le isi CD a Iopu o loo faaigoaina, o “Le alofa faatinoina”, ma e tele ni pese tāua ua iai i lenei CD, ae o se tasi o pese tāua o loo iai, ma o le pese foi lea na autū tonu i ai le faamoemoe i lea aso, o se pese o loo lagiina ai moomooga ma saafiafiga o alo ma fanau ma ē uma na tupuga mai le tina pele ia Felotea‘i Tuimalealiifano, na valaau i ai le Atua i le aso 7 Aperila 2012,  ma na atoa i ai le 100 o ona tausaga ma vaiaso e fitu ae tuumalo le tina.
Saunoa Pagamalie, “E muamua ona ou faafetai faatulou i le Atua le tamā le Alo ma le Agaga Sa. E lē ititi le agaga faafetai ia te au nei o Pagamalie Iopu ma lo‘u toalua, Taituuga Stephanie Tala‘i Fa‘ivalu, e tusa ai ma le faalauiloaina o lenei CD, ‘Le Alofa Faatinoina’.”
“E momoli foi le agaga faafetai tele i le tina ia Rina ma si ana tama o Cameron Ah Mu e sefulu tausaga, o ia lea o loo lagiina le pese e aualofa ai i lo latou tina peleina, aemaise ai Kerisimasi Lale, ua faaigoaina lenei pese, ‘Tofa Felotea‘i le tina pele’, faatasi ai ma le lagolagosua a ona mātua le Afioga ia Tuigamala Taavao Tuiafelolo ma le faletua ia Olevia.” Saunoa Pagamalie, o nisi o pese o loo usuina e si ona afafine e toatasi o Jennifer Filitaa Victoria Fa‘ivalu o loo iai lea i totonu o lenei CD, aemaise ai se tasi o pese na tusia e faafetai ai i le galuega alofa o loo faatinoina pea e lenei auauna agalelei o Papalii Lafulafu Peo, ua faaigoaina lenei pese, “O le poutoa agalelei”, faatasi ai ma se tasi o pese ua ta‘ua “Ua seu i fanua aiga i le Tai”, o nei lava pese uma sa tusiaina lava e ia (Pagamalie).
Saunoa Pagamalie, “E momoli ai pea le agaga faafetai i le Atua ona o le faaaogāina pea o lo‘u tagata e ala i taleni ua ia foai mai. Faafetai foi i le mamalu o aiga uma ma uo ma ē masani sa auai ma lagolagoina lenei faamoemoe i lea lava po fiafia. Faafetai, Faafetai tele!”