“Tau ina ou faia e viia ai le Alii.” O le igoa lea ua faaigoaina ai le CD fou a le Ekalesia o le Vaa o Noa, lea sa tatalaina i le nofoaga o le Dream Centre i Manaukau i le afiafi o le Aso Tofi 26 Iuni 2014.
Na matuā lē ofi le fale i le mamalu o le atunuu na agai atu e faafofoga ma molimau i fatuga fou ua mafai ona tuufaatasia e le susuga i le faafeagaiga ia Viliamau Kenese ma lana aufaipese. Na auai ai foi le toatele o susuga i faafeagaiga ma o latou faletua mai isi ekalesia. E sefulu pese faaleagaga o loo i totonu o lenei CD ma o le uluai taumafaiga foi lea a le aulotu talu ona faavae mai.
Na amata le polokalame i le afiafi i pesepesega a le aufaipese, ma faagasolo ai loa le faamoemoe. O le susuga lava i le faafeagaiga ia Viliamu Kenese na tatalo mo le amataina o le polokalame. O le fofoga o le po o le susuga i le faafeagaiga ia Teofilo Leapai ma o ia foi sa faafeiloaia le mamalu o le atunuu e pei ona iai faatasiga faapenei.
O le siva amata na saunia e le autalavou a le ekalesia o le Vaa o Noa, ma sosoo ai ma le pese na tusia e le susuga i le faafeagaiga ia Viliamu Kenese ua faaigoina, “O tua atu o tiga o manuia.”
Sa maua foi le avanoa e faafiafia ai nisi o tamalii o le atunuu ua iloga le latou tautua i musika, e pei o le susuga ia Pagamalii Iopu Faaivalu ma lona alo ia Jennifer, o Nill, Ofisa Nanai ma le susuga i le faafeagaiga ia Veti ma lana aufaipese.
Sa iai foi nisi o alo o le Ekalesia sa fai a latou molimau ma tautinoga i mea lelei sa fai e le Atua i o latou olaga. Sa faatauina foi le CD i lea po i le na o le $20. Na faaiu le polokame i le taumafataga tele na saunia ma tapenaina lava e le Ekalesia o le Vaa o Noa.
Ae na saunoa le susuga i le faafeagaiga ia Viliamu Kenese, o lenei faamoemoe ua leva ona tapenaina. O le tausaga e 2011 ma le 2012 na tusia ai nei pese ma faatalitali i le taimi o le Atua e tuufaatasia ai. Ma o lea la ua tau lau o le moemitiga e pei ona nofo tatalo i ai le ekalesia.
O le susuga ia Lale Talo o le Pacific Love na ia pueina ma tuufaatasia lenei CD i vaiaso e lua. O le faafeagaiga ia Viliamu Kenese e mai le afioaga o Safotu a o lona faletua ia Sina Kenese e mai le alalafaga o Sili i Savaii, ma e toasefuluiva matafale o le aulotu o loo galulue.
