E tele ni tausaga o Tautua le susuga i le faipese ia Tavita Sailele Mose Seuati i Ekalesia i Samoa, Niu Sila ma Ausetalia nei. Ae peitai o lea ua faailoa ma tatala aloaia lana tautua muamua o fatuga ma pese i aso faitele e pei ona faafofoga i ai le atunuu i Sini nei.
O loo aumau nei Sailele Mose i Mt Druitt ma o lenei CD muamua na ia tuufaatasia lava e faaaogā ai lana taleni o le piano, kitara, tagipalau, Saxophone ma lila.
O le susuga i le fatupese na aoga i le tulaga lua a Fagalii a o Galulue ai ona tuaa ia Rev Mose Seuati ma le faletua ia Matagitau i le EFKS.
Na sosoo ai ma le Kolisi a Leulumoega Fou a o lei faigaluega o ia i le Matagaluega o Femalagaiga i Matautu (M.O.T.).
O le taimi foi lea ua siitia ai nai ona mātua i le EFKS a Siumu. Sa faapea ona faipese ai Tavita Sailele i le Ekalesia ma i le taimi lava lea o loo iai i totonu o le Faaili lauiloa o le ‘Maatulua’ sosoo ai ma le ‘Papa Soifua’ a o alala o ia i Vaivasetai.
Na malaga mai Tavita Sailele i Niu Sila i le 1984 ma amata fesoasoani i nisi o Ekalesia ma a latou aufaipese. O le 1999 na siitia mai ai i Sini ma faapea foi ona silafia ai e le tele o Ekalesia lana fesoasoani lē faatuaoia lea e tatala ai lana tautua i soo se Aulotu.
O le agavaa o le fatupese na matau ai e aiga ma uo le ono see atu o le tautua i pese masani e faapine ai le tautua ua loa a le uso. “Sa toatele lava nai a‘u uo ma o‘u aiga na fiafia i lo‘u taina o pese Siva ma pese Samoa faapei e ‘One Man Band’ lona faatinoina.”
“O le agaga lava ina ia fatu ni pese mālie e faamanatu ai foi lenei auaunaga e pei ona foai mai e le matai o i le lagi e faasoa.”
O le CD muamua lava lenei na taina uma lava meafaaili e Tavita Sailele ma o se CD e ese auā o pese lava na tusia e ia ma Faanota e le faipese. “E tusa ma le fa vaiaso na tusia uma ai pese ma faia fati ae peitai e lei umi lava ona tuufaatasia ma pue.”
O le faigofie o le tapenaina o Pese e mafua mai i le umi ona ou faia le taleni lea sa pei e otomeki ai lava le sau o upu e faafetaui i ai fati o pese”, saunoa ai Tavita Sailele.
O nisi o pese molimanao i ai tagata i luga o leitio i Sini o le Fofoga Moomia ma le Sport Star e iai le ‘Pulega a Matai’ e faatatau i le matagofie o Pulega a alii ma Faipule o Samoa e malu ai.
O le isi Pese o le ‘Reggae’ mo i latou e fiafia i Pese mo tafaoga. O le ‘Dont Cry’ e mo faigauo ua ulu le alofa ma o le tele o fatuga e toe manatu ai i taimi o amata mai nisi o mafutaga i Samoa. O se taumafaiga e eseese ona fati e lē tao tasi e atagia ai le loa ona galue faafaipese le susuga Tavita Sailele.
Sa ia saunoa ai foi i le mafai ona faatinoina o se ta-faafaaili (One Man band) mo faamoemoe o Ekalesia ma Afioga i Sini. E na o le Polenisia Umu kuka ma Faumuina i Granville o loo maua ai lenei CD auā e talitonu Sailele o tagata Samoa e tatau ona faamuamua ona o la latou tautua Lotu, Afioaga ma le atunuu lea e pese i ai.
Sa faafetaia ai foi e Tavita Sailele le lagolago a i latou o fiafia ma faatauina lea CD muamua aemaise si ona toalua pele ia Teuila ma le fanau ia Lani, Abigail, Sione ma Gianna.
