O le itula e lua i le aoauli o le Aso Sa, 22 Me 2011, na ōsia ai e le taitai o le Ekalesia Katoliko i Ueligitone, le Afioga Akiepikopō John Dew, le Misasā e tatalaina aloaia ai se tasi o aulotu fou mo le Matagaluega Katoliko Samoa i Ueligitone.
O le taimi muamua lenei ua faavaeina ai se aulotu Samoa mo le Palisi a Sagato Petelo ma Paulo i Lower Hutt, ma o se agaga faagaeetia foi lea o le faifeau pule o lenei palisi, le afioga a Patele England Bruce.
Na saunoa Akiepikopō John Dew, o le tino mai lea o se tasi o faatofala‘iga tāua o le Sinoti mo Oseania i le Vatikano i Roma i le tausaga e 1998, aemaise foi o le faatāuaina o le sao o aganuu eseese i sauniga.
O le Sauniga o le Misasā, na faia uma lava i le gagana Samoa. O le afioga i le faletua o le tiakono, Ita Kasiano Le‘imoa, na fai ma sui o le nuu o le Atua na aofaga potopoto, e to‘ele ai i le sauniga o le Ifoga faa-Samoa, e talosagaina le faamagaloga a le Atua mo lona nuu.
O le Faanofoāliiga o le Upu, sa faatinoina e le fanau iti o le ekalesia.
O le momoliga o mea faitaulaga, e lē gata o le falaoa ma le uaina, ae sa momoli ai ma se taulaga lē ‘a‘u‘a‘u e ala i faasolo fugalaau mo le au ositaulaga, o se faailoga o le tasi‘aga o Keriso ma lona nuu, ua aofaga potopoto e patipatia lona alofa.
O le aufaipese lava a Sagato Petelo ma Paulo i Lower Hutt na peseina viiga o le Misasā.
O afioga i alii pelepitelo e toalima na lagolago i le Afioga i le Akiepikopō i le patipatiga o lenei sauniga, e aofia ai le afioga Patele Bruce England, le tamā pule o Sagato Petelo ma Paulo, o lona fesoasoani, o Patele Varghese, le afioga Patele Petelo Mauga, Patele Leone Iosefo, faapea le afioga Patele Penehe.
Sa auai foi le au nofo-voto i tamaitai sā faapea alii felela, o le aufaigaluega fesoasoani ma faletua, o le taitai o le Matagaluega, le afioga Salā Mika Teofilo, o le Taitaifono o le Matagaluega, Sa‘alea Malae‘ulu faapea le matagaluega Samoa i Ueligitone, ma le palisi o autū i ai lenei faamoemoe.
Na saunoa le afioga i le Peresitene o le aulotu fou, Rita Kasiano-Graves, ua fitu matāfale o le Aulotu ua iai i le taimi nei, ma o le agaga faafetai i le Atua, ona ua mafai ua amataina lenei aulotu fou.
Na mae‘a le taulaga paia o le Misasā, ona alo lea o le paia na aofia, i se taumafaga ti. Sosoo ai ma le faimeaalofa o aulotu Samoa na aao mafola ai mo le aulotu fou.
O le susuga i le faafeagaiga o le Ekalesia a Sagato Mikaele i Taita, le Susuga a Paulo Paulo, na saunia le tatalo faaiu, faatasi ai ma le faamanuiaga mai le Tamā o le Puleaga a Ueligitone, Akiepikopō John Dew, ma ta‘ape ai le mafutaga i lea aso.
E 32 atunuu eseese e i totonu o le Palisi lenei a Sagato Petelo ma Paulo i Lower Hutt, e aofia ai ma Samoa, ma o se tasi o Palisi pito telē lenei, i le Puleaga a Ueligitone.
