O le susuga ia Pastor Isara Heperona ma le faletua ia Tamara Heperona ua tofia nei e le ekalesia Voice of Christ, e taitaia pe faifeau foi i le galuega ua toe fofoaina i totonu o le taulaga o le aai i Otara Aukilani i Saute.
Na faatumulia le nofoaga i le Red Centre i Otara, i le afiafi o le Aso Sa, aso 15 o le masina nei o Me, i le mamalu o aiga uo ma paaga, aemaise foi o le mamalu i le auuso Kerisiano, i le molimauina o le faamoemoe o le aulotu, ma le matagaluega i Saute.
Sa auai foi nisi o taitai ma tulaga tofi o le matagaluega a Niu Sila. O le susuga ia Lepisi ma le faletua, atoa ma isi faafeagaiga mai isi lala o le tovine lava o le Voice of Christ.
O le susuga ia Isara Heperona sa faauu mai i le aoga Tusi Paia a le Ekalesia o loo i Tutuila, ma sa galulue ai pea ma le faletua i lalo o le taitaiga a le susuga i le toeaina le taitai o le galuega i Niu Sila, Uilisone Taito i Magele. Sa galulue ai pea o se aoao i ona tulaga masani o le ekalesia.
Ua silia ma le fā masina talu ona amata ma toe suotosinaina le laueleele o Otara, ae ua a‘e ai se manatu i le toeaina ma le taitai, ina ia aloaia loa ma faavae o se galuega fou. O le manaoga lava ma le faanaunauga, ia avea o se nofoaga e sulufai ma utuvai mai ai nisi mo le fia maua o le Faaolataga a le Atua.
O le faatuina o le ekalesia i Otara, ua aloaia ai foi ma le tofiga faifeau o le susuga ia Isara ma le faletua ia Tamara. O nisi tulaga tofi o le aulotu sa faauuina ma faapaiaina faatasi ai lea afiafi, o le Aoao, ma le Tiakono.
O le susuga ia Vaimili ma Tepora ua filifilia e tauavea le tofiga o le Aoao, a o Aitofele Arona ma le faletua, sa faauuina i le tofiga Tiakono. O i laua ia o le a lagolago malosi, ma tua i ai le auauna a le Atua, aemaise o le a galulue faatasi pea mo le tautuaina ma le tausia o le lafu mamoe i lea itu o le galuega.
O le susuga ia Isara Heperona e mai le afioaga o Faleaseela i Lefaga, a o lona faletua e mai le afioaga o Satuimalufilufi Alofi Aana Numera Lua.
E lē taumateina le viiga o le Atua i le sauniga i lea afiafi, ina ua faasoa ma tufa taumafa faaleagaga e ala i le Afioga faauuina, sa tomatauina e lana auauna le susuga i le taitai, Pastor Uilisone Taito.
Sa faigofie ona ofi i loto ma finagalo le savali momoli, ma e mālie i le faalogo lona faaupuina i le tele o saunoaga a le taitai, peitai e aati ma tuusa‘o i le mea moni o loo finagalo i ai le Atua. Saunoa le taitai i se isi vaega o lana tautalaga e faapea, E tiga le mea moni, ae lē tiga le mea pepelo.
O le feau sa faalaeiau ai le susuga i le faifeau ma le tau amataina o le galuega, ae lē gata i lea sa toe liuliu foi ma faatonutonu, ma luitauina ai le toatele o le aufaigaluega, ma tagata galulue i le tino o Keriso. O se isi luitau tāua tele, sa ia toe saunoa ai faapea, E tāua le ola faapaiaina ma le ola faamamāina.
O le mae‘a ai o le sauniga ma le faauuina o tulaga tofi ma le faapaiaina o le galuega, ona alo ai lea o le mamalu i faafeagaiga ma faletua, aemaise ai o le auvalaaulia sa molimauina lea afiafi ma le faamoemoe, i le taumafataga sa saunia lava e le Faifeau ma le faletua ma le mamalu o le aulotu fou sa osifeagaiga ma le Atua.
O faamoemoega faapenei, e le faigofie, ae tatou te manatua faatasi i le tatalo, ma e momoli atu ai foi ma faamanuiaga a le Samoa Times, mo le galuega ua amataina, ma ia avea o se laueleele e puna ai le vaimanino ina ia tosina i ai agaga ua galala i le fia inu i le finagalo ma le Faaolataga a le Atua.
