Ua toe sauni atu nei lē sa avea i se isi taimi muamua atu ma Tausala a Samoa ma le Pasefika ia Maryjane McKibbin-Schwenke, e faagasolo ni Aoga Siva Samoa i Sini nei e pei ona sa ia muamua ona totō i Niu Sila.
Na faaalia e Maryjane o le aai tele i Campbelltown i Saute Sisifo o Sini o le a amata ai lea faamoemoe pe a uma le lesitalaina o suafa. Na faaalia foi e Maryjane le faalauiloaina i fanau ma tagata sisiva o le uiga o taga ma le mafuaaga(theory).
O le taimi nei ua toatele mātua ua lesitalaina a latou fanau auā o se auala lelei e tauave ai nei Measina e telē se sootaga ma le aganuu Samoa. O le pitonuu tele o Campbelltown ua vaaia ai foi le toatele o Samoa ma le Pasefika ua alala ai.
E fuafua o le a matuā faatupulaia lenei aoga auā e telē le agavaa o Maryjane faapea lona lauiloa i le ata tifaga o le Sione’s Wedding.
E mafai ona faafesootai avanoa i lana telefoni 0412173809 ma o se avanoa e malamalama atili ai fanau ua soifua ane i Ausetalia nei. O totonu lava o Sini nei na amata ai le taumafaiga a Maryjane e avea ai ma tausala o Samoa.
Na faafiafia foi la latou ausiva e aofia ai lona toalua ia Fred Schwenke ma lo la Alo tamaitai ia Moemoana Schwenke. E moomia tele faafiafiaga a Samoa ma suifefiloi a lenei ausiva lea na valaaulia ai e faafiafia i le koneseti a Jerome Grey i Sini nei faapea le taunuu mai o le alii pese o Mailo Ben Vai.
