Tatala Aoga Amata Ekalesia PIC Avondale

E ui ina loulouā uiga o le tau i le savili malulu ma timuga, peitai sa lei faatafa ai le mamalu o le auvalaaulia, aiga ma uo aemaise lava o aiga lotu o le ekalesia PIPC i Avondale, i le agai atu mo le molimauina o le galuega ua mae‘a, ma ua lava tapenaina lelei mo le faamoemoe o le fanau, mo aoaoga amata.

E tusa ai ma se saunoaga a le susuga i le faafeagaiga o le ekalesia, le susuga ia Asora Amosa, sa ia ta‘ua ai e tusa ua lua tausaga talu ona amata le aoga a le fanau. Sa amata lava i le play group ia poo se amataga ua na o se vaega e faataitai ai, faiga ma metotia e aotauina ai le fanauiti, a o se avanoa foi mo faiaoga aemaiase lava o nisi e fia avea ma faiaoga mo le lumanai.
O lea lua tausaga sa amata ai lea faiga, sa avea foi o se taimi sa lē nofonofo filemu ai le komiti faafoe ma le mamalu o le ekalesia, ae sa faataoto ai ma le polokalame ma le naunautaiga o le a fausia se nofoaga faapitoa mo le aoga a le fanau. O le Play Group sa faatinoina lava i le vaega pito i lalo o le hall a le ekalesia i Avondale lava.

O le faatinoina o le galuega ma le poloketi fou sa tatalaina aloaia i le Aso Toonai o le vaiaso talu ai, sa malilie ai le ekalesia ma le komiti galulue mo le tuuina i lalo o se tasi o aseta a le Lotu, ma o le maota foi lea sa faaaogāina e le auauna a le Atua, mo le galuega. O le vaega tonu lea sa amata fausia ai le nofoaga fou e pei ona faapaia ma tatalaina.

E toatele sui mai le matagaluega o aoga sa auai ma molimauina le matagofie ma le saunia lelei o le nofoaga.

Sa molimauina foi e le tatou nusipepa le anofale i lona faatotogaina ma vaega uma mo le faataunuuina o aoaoga a le fanau. E lē gata i lea, ae faapea foi ona ofisa ma potu ua faapitoa mo soo se manaoga manaomia e faiaoga faapea le fanauiti.

O le maea o le sauniga aloaia sa tatalaina ai le faleaoga fou, ona faaauaua lea o le polokalame i le hall a le ekalesia. O le taumafataga mo le auvalaaulia, o aiga ma uo sa faatasi atu, sa saunia lava e le ekalesia. O se vaaiga matagofie foi i le maitau ona o le galulue faatasi o vaega ma muliauma eseese o le ekalesia, mo le faatinoina o fuafuaga uma sa saunia.

O le susuga i le faafeagaiga ia Asora Amosa, sa ia faatautaia le polokalame atoa i le va ma malo faaaloalogia, aemaise lava o le ofisa o aoga sa auai ai. O le susuga i le failautusi ma le laulau a fono, o le komiti a le ekalesia sa tuualalo, ma fesoasoani i le fofoga o le aso, i le faagaioia ma le faagasologa o le polokalame seia mae‘a.

O le aufaipese tele a le ekalesia sa fai foi lo latou sao e ala i viiga o le Atua na saunia ma tapenaina. Peitai o le fanau poo tamaiti o le aoga amata sa manumalo lava i le aso e ala i pese ma siva ma faafiafiaga sa alo i ai, mo le faafiafiaina o le auvalaaulia ma aiga.

Ua sauni nei le fanau e ulufale ma faaaogā le faleaoga fou ua mae‘a ona fausia mo i latou, ma aeaeina le gapatia ma le milimilosia o mātua ma le mamalu o le ekalesia sa faataunuu ai le faamoemoe. Ia manuia le faleaoga fou, aemaise o le lumanai o fanau ina ia tulai mai ai nisi toa mo le atunuu i soo se matata ma soo se galuega o le a totofi ai e le Matai Sili i le Lagi.