O le taeao o le Aso Toonai ua mavae na tumutumu ai totonu o le taulaga faatau i Magele i le toatele o le atunuu na lolofi atu e molimauina le tatala aloaiaina o le polokalame o le Kanesa o le Laualo i totonu o Aukilani i Saute.
O le polokalame sa amataina ia Iulai i le tausaga nei ae o le faamoemoe lenei i le Aso Toonai ua aloaia ai le faalauiloaina faalautele o lenei polokalame i tagata Pasefika ma tagata Maoli ina ia latou iloa o lea ua ofi mai le polokalame lenei i lea itu o Aukilani. O le itu i Sisifo o Aukilani i Waitemata pau lea o le nofoaga sa faataunuuina ai lenei polokalame mai le tausaga 2011, ae o le saili malo ma le finafinau o le susuga ia Lorenzo Kaisara o loo galue ai i totonu o lenei matagaluega, na afua ai ona maua se polokalame faapenei i le itu i Saute o Aukilani ma maua ai lenei avanoa e fai ai le siaki fai fua lea o le kanesa i totonu o Aukilani i Saute.
O le tāua foi la o le faamoemoe i le Aso Toonai ua mafai ai ona militino faatasi tagata uma o le Pasefika mai atunuu eseese o loo aumau i Aukilani e faasoa atu iai lea avanoa tāua mai lea matagaluega i Counties Manukau District Health Board ina ia mafai ona latou faatāuaina lea manulauti ua saili malo iai alo ma tamafanau o le atunuu auā lo latou soifua maloloina lelei.
O le toatele o faauluuluga o matagaluega o le soifua maloloina ma faauluuluga o kamupani faapea nisi o faalapotopotoga sa auai i lea polokalame e pei ona faatasi atu iai le afioga i le Minisita o Tagata Atumotu o le Pasefika ia Aupito Su’a William Sio, Fepuleai Margie Apa (CEO CMDHB) Dr Asraf Choudhary (Board member CMDHB) Kathy Pritchard (Service manager Bowel Screening Programme) Hasitha Samarasinha (Project Manager Bowel Screening Programme) To’a Fereti (Clinical Nurse Director) (Medicine & Clinical Support) CMDHB, Dr David Schaaf ( Public Health Advisor) (Pacific Health Development) CMDHB, Dr Alasdair Patrick (Clinical Lead Bowel Screening Programme) Tofa Suafole Gush (Chairperson NBSP Pacific National Network Fono) Kaumatua Hone (Mataatua Marae Mangere) Tafunai Tasi Lauese (Local Board Member Mangere & Otahuhu Local Boards) Leaupepe Pili Ioane (ta’ita’i o le mafutaga tutoatasi Magele) Loli Mesepa (Parish Nurse Alliance Health Plus) ma le loaloa o tagata o atunuu eseese.
O le 10 i le taeao na amataina ai le polokalame i lalo o le faauluuluga a le Counties Manukau Health Bowel Screening. O se feau tāua ma se feau aogā ua momoli mai i lenei polokalame ina ia a’oa’oina ai pea le faatāuaina o le faia o le siaki e uiga i le Kanesa o le Laualo.
O le Kanesa o le Laualo o le lona lua o kanesa o loo maualuga ai le faitau aofai o tagata Pasefika ua maliliu ai pe a faatusatusa lea i tagata palalagi, ae i faamaumauga a le Counties Manukau Health Care Screening i le fomai ia Dr Alasdair Patrick ua pa’ū maualalo le fuainumera o tagata Pasefika ua aafia i suesuega a le polokalame.
O tagata Pasefika e mafai ona manuia le toatele o tagata pe afai ae vave iloa ma latou faatāuaina lea avanoa lelei e fai ai le siaki o lea gasegase. Ma o loo faamalosia ai foi la e lea matagaluega le toatele o le mamalu o le atunuu mai le 60 tausaga i le 74 tausaga ina ia unaia e fai le siaki lenei auā le soifua manuia ma le soifua maloloina o tagata Pasefika.
O loo iai vaega taitasi o Aukilani o lea ua faatulagaina ai polokalame a lea matagaluega e faia ai faatalatalanoaga e uiga i lea gasegase ma e tatau foi la i tagata uma ia aua ne’i misia lea avanoa lelei.
O le polokalame ua uma ona tatala aloaia faa-Maoli i Aukilani i Saute, peitai ane e galue mai le alo o le atunuu ia Lorenzo Kaisara i totonu o lea matagaluega e lei iai se tatala aloaiaina faa-Pasefika ma o le ala tonu lea o le faamoemoe e pei ona iai le taeao o le Aso Toonai, ua mafai ai ona tatala aloaia lea polokalame i totonu o le Pasefika. O le susuga ia Lorenzo Kaisara o ia lea o loo faauluulu iai polokalame mo tagata Samoa ma le Pasefika.
I le saunoaga a le afioga i le Minisita ia Aupito Su’a William Sio, na ia faamamafaina ai le maliliu lea o tatou tagata i faama’i e ono puipuia, e autu lea saunoaga a le Minisita i le fuaitau e faapea e sili atu le puipuia nai lo le togafitia.
Ona o le toatele o tatou tagata Samoa ma le Pasefika e faatoa oso atu lava e fai le siaki ua tuai, ua leva ona maua le ma’i i le tino, ae o lea o loo tuu alaga pea nisi o alo ma tamafanau o le atunuu e unaia ai le mamalu o tagata e tatau ona fai le siaki mo le gasegase ina ia mafai ona ola puipuia le tagata ma ola soifua maloloina.
E tatau la i tagata ona faatāua le fai o le siaki lea, ia faaaogā foi fanau e faamatalaina i tuaa matutua le tāua o lenei siaki ina ia mafai ona malamalama lelei i latou i le uiga o nei polokalame. O se tasi vaega tāua i le saunoaga a le Minisita na ia valaauina ai susuga i faafeagaiga i totonu o ekalesia ina ia tuu mai o latou tau’au e lagolago ma unaia ai tagata o aulotu e faatāua polokalame a le soifua maloloina.
Ona o le lagona o le Minisita o faifeau o ta’ita’i ia i ekalesia e mafai e latou ona faalautele lea feau tāua i totonu o aulotu ina ia faigofie ona ulu le faamoemoe tonu o le polokalame i o tatou tagata.
O le tele o faafiafiaga sa faafiafia ai le mamalu o le atunuu i lea aso, ina ia aua ne’i palasi ia Samoa le mamafa o lenei polokalame ae ia piki mai atunuu o loo toatele o latou tagata o loo aumau i totonu o Aukilani i Saute. O aufaafiafia na aofia ai le Nga Iwi Primary School Kapa Haka, Tonga Dance Group mai Otahuhu, Drums of the Pacific ma le Tipaula Dance Group.
