E ese foi lagona sa iai lea aoauli o le Aso Tofi, 31 o Ianuari 2013, a o saunoa le Taitai o le atunuu, lana afioga i le Palemia, Susuga Tuilaepa Lupesoliai Sailele Malielegaoi, i le tatalaga aloaia o le maota mo le Konesula o Samoa i Aukilani, ma faalauiloa ai e le Palemia, o le fanua atoa lea ua faatulaga ai nei maota e lua, e tusa ma le 4 eka, o le fanua atoa ma fale uma nei, o meatotino lava a le Malo o Samoa.
O lagona faagaeetia ma le fiafia i le iloa o loo faasolosolo pea i luma ona tino mai atinae ma galuega mautu e ta‘ua ai lava le igoa o Samoa, o ni meatotino a le malo o Samoa, e ui o loo faatulaga i se isi atunuu ese e pei o Niu Sila nei.
E toatele nisi o tino taualoa o le malo Samoa mai Samoa ma Niu Sila nei, sa potopoto ai i lea aso ina ia molimauina faatasi ma le Taitai o le atunuu, le afioga i le Palemia, lea aso tāua, ua tatala aloaia ai le maota nofo ua faatulaga mo le Konesula aoao o Samoa i Aukilani.
O le tamaitai faipule mai le vaega faaupufai a le New Zealand First, ae o se tamalii Samoa, le Afioga Le‘aufaamulia Asenati Lole-Taylor, na ave i ai le faaaloalo maualuga e ootiina le lipine e tatala aloaia ai faitotoa o le maota fou.
E pei ona silafia, ua leva ona iai lea tofi tāua o le malo Samoa i Aukilani, ma sa faatulaga ai lona nofoaga ma le ofisa o le Konesula i Ponsonby i le aai o Aukilani.
Ae o le sauniga i le Aso Tofi, sa saunoa ai le taitai o le atunuu, le afioga i le Palemia, ma ia ta‘ua ai, o fuafuaga nei a le malo ua amata faasolosolo, ina ia mulimuli ane, o le a aumai uma ofisa a le malo o Samoa, i se nofoaga e faigofie ona agai i ai tagata Samoa uma o loo fia maua lana auaunaga.
O le ala lea o le filifilia o le fanua i Magele, auā o le faaitu i Saute o Aukilani lea ua pito sili ona toatele tagatānuu Samoa o loo alala ma aumau ai.
E tusa ai ma saunoaga a le Palemia, o lenei fuafuaga na amata faatalanoa i tuā i le tausaga e 1990, ae sa iai foi nai lavelave na faapogai ai ona faaumiumi le gasologa mai o lenei galuega ma fuafuaga a le malo, ae o se fiafiaga tele lea, ona o lenei ua iu ina tino mai se isi vaega tele o nei fuafuaga faataatitia a le malo.
Saunoa Tuilaepa, sa silasila le Malo i le manaoga ia iai se nofoaga e patino lava mo le faia o fonotaga a tagata Samoa o loo alaala i isi atunuu e ese mai Samoa.
E maitau e le taitai o le atunuu, o le tele o taimi e maitauina ai lava i le tele o taimi pe a fai ni fonotaga a Samoa o loo aumau i isi nofoaga e ese mai Samoa e iai tele lava ina fetōtōa‘i finagalo faaalia ma faigata ona maua se tasi.
O le ala lea na a‘e ai se finagalo, e tatau lava ona iai se nofoaga faapitoa mo le soalaupuleina o mataupu tāua a le atunuu, e pei ona iai le ‘Malae o Tiafau’, ma faatulaga ai loa lenei fuafuaga.
Na faailoa ai foi i lea aso ma le igoa o le faaigoa ai le nofoaga faapitoa lenei mo fonotaga a le atunuu pe a oo ina mae‘a, o le “Alafamua,” o lona faauigaina, o se nofoaga e susulu atu ai le malamalama i mea o loo faapea ona faapogisaina ai tagata.
Ma o le “Alafamua” o le nofoaga lea o le a potopoto mai i ai Samoa mo le tapenapenaina o a latou mataupu faatino mo isi atunuu.
O le taimi nei la o lea ua muai fausia nofoaga mo le Konesula Aoao o Samoa Faolotoi Reupena Pogi, ma le isi nofoaga na muamua mae‘a ma ua faaaogāina nei e le Komesina o Fefaatauaiga, Fonoti Dr Lafita‘i Fuata‘i.
Ua iai foi la le isi fanua o le Malo Samoa i le nofoaga o le Taulaga Faatau i Magele, o ina lea o le a fausia ai i se taimi e lē o toe mamao le nofoaga lea e faatulaga ai ofisa o le malo Samoa, faatasi ai ma se ‘fale Samoa’ o le a fausia i lea lava fanua.
E iai isi mea e tatau ona faamautu mai le Pulega a le Aai o Aukilani, ma o le taimi lava e mae‘a ai ma faamautinoa mea uma, ona amata loa lea o le galuega, lea e iai le faamoemoe e tatau ona mae‘a lava i se taimi o le tausaga lenei, 2013, ma aumai uma ai loa ofisa o le Malo o loo iai i lona nofoaga i Ponsonby i le taimi nei, ae faatino uma loa i Magele.
