Malo faaaloalogia sa auai i le tatalaina o le vaiaso o le Gagana Samoa

O le po o le Aso Sa na faataunuuina ai sauniga lotu i pitonuu eseese o Niu Sila o loo iai le faalapotopotoga o le Fagasa e tatala aloaia ai le vaiaso ua faatāuaina ai le gagana Samoa i totonu o Niu Sila. 

Pau le eseesega o sauniga nei i pitonuu taitasi, ona o Aukilani i Saute na faatinoina le sauniga lotu i le maota o Samoa e valaaulia uma ai le mamalu o le atunuu e auai faatasi e faatāua le aloaiaina o le amataina o le vaiaso o le gagana Samoa.

O polokalame uma o le sauniga e faatinoina lea e alo ma fanau laiti, e pei o le ‘ava o le feiloaiga e tapenaina lea e le aoga tulagalua a Mangere East, o le fofoga o le po o alo ma fanau mai le aoga tulagalua a Sutton Parks ma faafiafiaga o le aoga tulagalua lava a Sutton Park ma Ferguson Intermediate. O saunoaga autū o le afiafi na saunoa i ai le afioga i le Minisita o tagata atu motu o le Pasifika ia Hon Aupito Su’a William Sio, lea na ia faailoa ai lona agaga naunau pea o loo tu’itu’i ai le malo ina ia maua pea avanoa e faaauau ai le faatāuaina o le gagana Samoa i totonu o Aotearoa i tausaga taitasi.

Ae o le saunoaga a le afioga i le Konesula o Samoa ia Faolotoi Reupena Pogi, e tāua le upu Talanoa ma Fesootai i lou aiga, uo ma ekalesia i lau lava gagana Samoa. Ma e tāua foi le toaaga e faitau le Tusi Paia auā o le taiala sili lea ona fesoasoani i le a’oa’oina o le gagana Samoa i fanau. 

O le autū o le vaiaso o le gagana Samoa, “Lalaga le Siosiomaga mo le lumanai manuia” ae na faatusatusa e le afioga i le Konesula le autū i le tiute ma galuega a tina Samoa, o le lalagaina lea o fala ma o le latou lea tiute fai, e lalaga le fala ina ia tino mai le galuega o loo fai, e faapena se faatusatusaina o lenei autū e tatau ona lalaga lelei le gagana Samoa i alo ma fanau ina ia mafai ona ola ma savavali ai fanau lalovaoa o le atunuu auā so latou lumanai manuia.

Aoga Tulaga lua Mangere East na saunia le ava o le feiloaiga

O le gagana o le meaalofa lea mai le Atua, o le aganuu o le meaalofa foi lea mai le Atua, lea ua fai mai ai le faisalamo o Tavita, ia aua ne’i galo se mea e tasi o ana meaalofa ua tuuina mai ia Samoa. O le upu tomatau lea na saunoa i ai le ta’ita’i o le sauniga le susuga i le faafeagaiga ia Avele Tanielu e taiala ai le tapenaina o le tatalaina o le vaiaso o le gagana Samoa.

Ae pei ona faamanino e le afioga i le taitaifono o le Fagasa ia Faatili Iosua Esera, e tele ni polokalame o lea ua fuafuaina e aoga eseese i totonu o Niu Sila atoa i le faatāuaina o le gagana Samoa. 

O loo faapea foi ona faatauanau le tele o aoga o loo toatele ai alo ma fanau Samoa ina ia avea lenei vaiaso e faamanatu ai ma faatāua ma se’i tau siisii a’e ai i luga le faatāuaina o le gagana Samoa, ina ia faaaogā e le tele o aoga i totonu o Niu Sila nei. 

O le autu ua malilie i ai paaga faatasi ai ma le faalapotopotoga o le Fagasa lea ua mafua ai le autu filifilia o le gagana Samoa i lenei tausaga. O le matagaluega o aoga, matagaluega o tagata atu motu o le tasi lea vaega o loo tele le latou sao i le tapenaina o le gagana Samoa i tausaga taitasi. O le manulauti filifilia “Lalaga le Siosiomaga mo se lumanai manuia” o le taumafai lea e avatu se autū ina ia faasoa i ai manatu o fanau, ae o se lagona foi i le Fagasa ma paaga o le manatunatu foi lea o faiaoga, mātua, ekalesia, o faifeau ina ia lalaga se siosiomaga ina ia mafai ona ola le gagana Samoa i totonu o Aotearoa poo fea lava e iai le Samoa e tāua le gagana. 

O le vaitaimi nei ua tele auala ma metotia ua osofaia ai ma ono lepetia ai le tautalagia o le gagana Samoa e atunuu mamao ona o le tele o mea ua tagofia e tamaiti faatenekolosi faaneionapo. O le mea la lea e tatau ai ona mataitu ai mātua, poo ā lava ni galuega o loo fai i totonu o latou aiga ia taumafai lava ia ola le gagana. O lea ua aumai nei faamaumauga o le tausaga 2013 na’o le 86,000 o tagata Samoa i totonu o Aotearoa e tautala i le gagana Samoa mai le aofai e 145,000. O lona uiga o pasene o tagata Samoa i totonu o Aotearoa e tautalagia le gagana Samoa o loo faaseesee pea i lalo. O le faaletonu la o loo tulai mai o le 59 pasene o tagata Samoa i Aotearoa o loo mafai ona latou faaaogāina le tatou gagana. O le lave o le tele o alo ma fanau o Samoa e fia Samoa, e mimita o Samoa ae o le faaletonu e o atu loa e fai mea i totonu o ekalesia poo aiga ona tutu mamao lea ae lē o e fai mea e tatau ai ona iloa le faa-Samoa. 

O le tuualalo a le afioga i le taitaifono o le Fagasa i aiga, mātua, ekalesia o faifeau, ia fai ni auala e ola ai le gagana Samoa ina ia toatele ni tagata e tautalagia le gagana Samoa.

Matagofie le faamoemoe i le afiafi o le Aso Sa i le auai atu i ai o malo faaaloalogia mai nisi o matagaluega, aemaise o mātua faapea susuga i faafeagaiga ma o latou faletua faapea ma fanau laiti i le tatalaina o le vaiaso o le gagana Samoa i lenei tausaga 2019. Na taualuga polokalame i le mālū afiafi na saunia e le faalapotopotoga o le Fagasa i Aukilani ma saunoa ai loa le tofa ia Fiu Semo Letufuga e faamae’a le faamoemoe i faaaloaloga.